КДБ распавёў, што затрыманыя мусульмане ўваходзілі ў «Хізб ут-Тахрыр»
Камітэт дзяржаўнай бяспекі Беларусі паведаміў пра затрыманых у Мінскім раёне мусульман-салафітаў. Выпадак меў месца ў канцы лістапада 2014-га года, але паведамілі пра гэта толькі зараз, пасля тэракту ў Парыжы.
Прэс-сакратар КДБ Артур Стрэх паведаміў Еўрарадыё, што «гэтая група сфармавалася пад уплывам рэлігійна-экстрымісцкай арганізацыі «Хізб ут-Тахрыр». У ёй было 5 замежных грамадзян і 15 грамадзян Беларусі. Апошнія павінны былі праводзіць місіянерскую незаконную дзейнасць сярод мусульман на тэрыторыі Мінскай, Гродзенскай, Магілёўскай абласцей (як вядома, у нашай краіне жыве больш за 30 тысяч мусульман).
«Чакаць, пакуль яны здзейсняць канкрэтныя правапарушэнні ці злачынствы, зразумела, ніхто не стаў. Пакуль яны не здзейснілі нічога супрацьпраўнага, былі ўжыты дастаткова лаяльныя меры прафілактычнага характару», — распавёў Еўрарадыё Артур Стрэх..
Затрыманыя замежнікі былі дэпартаваны з нашай краіны. Што да грамадзян Беларусі, дык іх папярэдзілі, кажа прэс-сакратар КДБ.
Партыя «Хізб ут-Тыхрыр» налічвае каля мільёна актыўных удзельнікаў. На расійскім сайце арганізацыі паведамляецца, што яна «адмаўляе гвалтоўныя дзеянні ў мэтах пабудовы ісламскай дзяржавы». Пашыраюцца яны метадам «сецявога маркетынгу», як і «Аль-Каіда». Салафіты выступаюць за фундаменталізм у ісламе. Паводле іх ідэалогіі, мусульманін мусіць жыць гэтак жа строга, як першыя мусульмане. Салафітамі адмаўляюцца паломніцтвы да магіл святых.
Арганізацыю лічаць забароненай у шэрагу краін свету.
Напрыклад, у Расіі і Таджыкістане. У Нямеччыне публічная дзейнасць «Хізб ут-Тахрыр» забаронена за антысемітызм. У суседняй Украіне партыя дзейнічае легальна, праводзіць свае з’езды. Цікава, што прадстаўнікі партыі называюць Злучаныя Штаты «галоўным сатаной», але ў Паўночнай Амерыцы форумы «Хізб ут-Тахрыр» праводзяцца легальна.
Цяпер чытаюць
Кобрынца, які застаўся без нагі пасля выбуху машыны, пасадзілі за кантакт з журналістамі. Пасля вызвалення ён расказаў сваю гісторыю1
Каментары