Дацкая тэнісістка Каралін Вазняцкі абвясціла пра завяршэнне кар'еры, паведамляецца на сайце Australian Open.
У пятніцу Вазняцкі ў трэцім крузе першага ў сезоне турніру серыі «Вялікага шлема» прайграла Онс Жабер з Туніса — 5:7, 6:3, 5:7. Для 29-гадовай датчанкі гэта быў апошні матч у кар'еры. У снежні 2019 года тэнісістка заяўляла, што турнір у Аўстраліі стане для яе апошнім. Тады яна тлумачыла свой сыход не найлепшым станам здароўя, піша РБК
На рахунку Вазняцкі 30 перамог у адзіночным разрадзе на турнірах Жаночай тэніснай асацыяцыі (WTA). Яна перамагала на Australian Open у 2018-м, у 2009 і 2014 гадах выходзіла ў фінал Адкрытага чэмпіянату ЗША.
Гэта першая тэнісістка з Даніі, якой калі-небудзь ўдавалася ўзначаліць рэйтынг WTA: Вазняцкі была на першым радку на працягу 71 тыдня з 2010 па 2011 г.
У лістападзе 2010 года Вазняцкі прыязджала ў Мінск, дзе разам з Вікторыяй Азаранка згуляла дабрачынны матч, да якога падключыўся Лукашэнка.
Тады паміж Беларуссю і Еўропай быў прыязны перыяд, які скончыўся пасля 19 снежня 2010 года.
Тады ўсе грошы, сабраныя ад продажу квіткоў, таксама як і тыя, якія тэнісісткі зарабілі, выставіўшы на аўкцыён асабістыя рэчы, былі перададзеныя дзіцячаму анкалагічнаму цэнтру ў Бараўлянах. У гэты ж агульны дабрачынны фонд дадаўся і месячны заробак прэзідэнта, пералічаны кіраўніком дзяржавы.
Каментары