У Гродне трох фігурантаў «справы Ціханоўскага» асудзілі на тэрміны ад 2 да 4 гадоў калоніі
У судзе Кастрычніцкага раёна Гродна з 18 студзеня разглядалі крымінальную справу супраць траіх фігурантаў «справы Ціханоўскага», якіх затрымалі на выбарчым пікеце 29 мая мінулага года ў Гродне, паведамляюць праваабаронцы.
У Гродне вынеслі прысуды фігурантам «справы Ціханоўскага». Дзмітрыя Фурманава, Яўгена Разнічэнку і Уладзіміра Кнігу абвінавачвалі ў актыўным удзеле ў дзеяннях, якія груба парушаюць грамадскі парадак 29 мая ў Гродне (ч.1 арт. 342 КК). Акрамя гэтага, Разнічэнку і Кнігу абвінавачвалі ў гвалтоўных дзеяннях у дачыненні да міліцыянтаў (арт. 364 КК).
Суддзя Вольга Бекушава пакарала Дзмітрыя Фурманава — двума гадамі калоніі ва ўмовах агульнага рэжыму, Яўгена Разнічэнку — трыма з паловай гадамі калоніі ва ўмовах агульнага рэжыму, Уладзіміра Кнігу — чатырма гадамі калоніі строгага рэжыму.
Менавіта такое пакаранне запрасіў пракурор Мікіта Мыслівец. Таксама суд абавязаў Разнічэнку і Кнігу выплаціць пацярпелым участковым Казлоўскаму і Хваленю па 1000 рублёў маральнай шкоды.
Каментары