Навоша: Калі ў нас забяруць маёмасць, значыць, і лукашэнкаўцы будуць уласнай маёмасцю пасля выплачваць кампенсацыі палітвязням
Заснавальнік Sports.ru пракаментаваў «Нашай Ніве» рашэнне Следчага камітэта аб завядзенні першай завочнай справы супраць пяці праціўнікаў Лукашэнкі, якія знаходзяцца за мяжой.
«Як «экстрэміст», заснавальнік забароненага спартовага сайта і гэтак далей, я не здзіўлены. Усе там будзем, — напісаў Дзмітрый Навоша «Нашай Ніве» ў адказ на просьбу пракаментаваць рашэнне Следчага камітэта аб завядзенні першай завочнай справы супраць пяці палітычных праціўнікаў Аляксандра Лукашэнка. — Урэшце, у кожнага, хто ясна выказваецца супраць крадзяжу выбараў і не глядзіць абыякава на лукашысцкі тэрор, будуць адбіраць, што змогуць — нерухомасць (на маю кватэру ўжо накладзены арышт), грамадзянства.
Да апошняга дня лукашызму яны будуць з наўмысным чмяканнем жэрці людзей — каб трымаць астатніх у страху і пакоры.
Думаю, залішне казаць, што я не лічу сябе вінаватым хоць па якіх-небудзь з выстаўленых абвінавачанняў. Больш за тое, я не схільны лічыць сябе ахвярай (у параўнанні з людзьмі ў турмах асабліва): я жыву поўным жыццём і працую ў вольным свеце, дзе прысуды лукашысцкіх судоў нікога не цікавяць», — напісаў «Нашай Ніве» Навоша.
Ëн лічыць, што лукашысты «не кантралююць больш нічога, акрамя гвалту ўнутры канцлагера, які часова існуе на месцы Беларусі».
«Калі пазбавяць грамадзянства? — працягвае Дзмітрый. — Так, ніякага іншага грамадзянства ў мяне няма. Але ўжо як-небудзь цывілізаваныя краіны дапамогуць тым, каго праследуюць па палітычных матывах. Так, кватэру шкада — але яна вернецца разам з вяртаннем у Беларусь свабоды. Больш таго, гэтым сваім непрыкрытым рабаваннем лукашысты адчыняюць скрыню Пандоры.
Здаецца, цяпер становіцца зразумела, за чый кошт дзяржава будзе пасля выплачваць кампенсацыі палітвязням (я не пра сябе, а пра тых, хто сядзіць цяпер у турмах). Гэта будзе нерухомасць людзей, на якіх пакуль трымаецца рэпрэсіўная машына», — прагназуе Навоша.
«Увогуле, стаўлюся да чарговай крыміналкі і будучага «суда» як да яшчэ адной порцыі праклёнаў ад Мукавозчыка або новага крыку Азаронка ў мой адрас: белы шум. Гэта не асабліва ўплывае на маё жыццё, а вось на іх — яшчэ паўплывае», — напісаў Дзмітрый.
-
У мінскія крамы завезлі экзатычныя плады з Калумбіі
-
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі
-
Як цяпер выглядае старадаўні касцёл, на выратаванне якога дзяржава збірае ахвяраванні ФОТЫ
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі26
Каментары