Аўтар раману «Параноя» прызначаны в.а. кіраўніка Дэпартамента палітычных навук ЕГУ
«Калі не будзе рэзкіх пярэчанняў супраць маёй кандыдатуры, то я хацеў бы паспрабаваць сябе ў новай ролі» – адзначыў Віктар Марціновіч.
Як стала вядома «НН», аўтар скандальнага раману «Параноя» Віктар Марціновіч прызначаны в.а. кіраўніка Дэпартамента палітычных навук Еўрапейскага гуманітарнага універсітэта (ЕГУ).Дагэтуль спадар Марціновіч быў вядомы грамадскасці як журналіст, культуролаг, пісьменнік ды палітычны аглядальнік.
Прызначэнне цікавае тым, што сп. Марціновіч не займаўся дагэтуль палітычнай навукай, а такая пасада вымагае наяўнасці навуковага бэкграўнду ў адпаведнай дысцыпліне, які, прыкладам, мела спн.Святлана Навумава, што займала гэтую пасаду дагэтуль.
Аўтар «Параноі» падцвердзіў у размове з «НН» дакладнасць атрыманай інфармацыі.
«Так, мяне насамрэч прызначылі часова выконваючым абавязкі кіраўніка Дэпартамента. Хто стане яго кіраўніком, будзе вядома толькі ў ліпені. Калі не будзе рэзкіх пярэчанняў супраць маёй кандыдатуры, то я хацеў бы паспрабаваць сябе ў новай ролі» – адзначыў В.Марціновіч.Ён таксама заўважыў, што ў літоўскіх універсітэтах існуе шмат прыкладаў, калі аддзяленнямі паліталогіі кіруюць спецыялісты з сумежных галінаў. «Гэта пашыраная ў сучаснай адукацыйнай прасторы практыка» – паведаміў спадар Марціновіч.
Пазалетась В.Марціновіч абараніў дысертацыю на тэму «Віцебскі авангард (1918—1922): сацыякультурны кантэкст і мастацкая крытыка». Галоўная ягоная праца — пасада намесніка рэдактара «БелГазеты».
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»24
Каментары