З вальера заасаду на вачах у наведвальнікаў уцякла ваўчыца. Адміністрацыя: Нічога страшнага, яна сама баіцца людзей
Едучы адпачываць у добраўпарадкаваную маляўнічую сядзібу, звычайна не чакаеш, што давядзецца ўцякаць ад патэнцыйнай атакі дзікага звера. А менавіта гэта ледзь не здарылася, паводле слоў чытача Onliner.by, 29 ліпеня ў музейным комплексе «Дукорскі маёнтак». Больш дакладна — у зверасадзе, дзе ў вальерах сярод іншых жывёл жывуць ваўкі.
— У музейным комплексе я быў з дзіцём. У нас на вачах, на адлегласці дзесяці метраў, з клеткі вылезла ваўчыца. Мы пабеглі ў бок касы, па дарозе папярэджваючы наведвальнікаў вяртацца. Паведамілі касіру.
Мужчына кажа, што наступныя паўтары гадзіны ён разам з дачкой правёў у кавярні, размешчанай на тэрыторыі. Паабедаўшы, патэлефанаваў у адміністрацыю, каб даведацца, як ідуць справы з ваўчыцай. Адказ яго здзівіў: маўляў, усё як звычайна, людзі прыязджаюць, комплекс працуе ў штатным рэжыме.
— Сэрвіс… — іранізуе спалоханы наведвальнік, — Я думаў, што ўсё закрыюць на час адлову, наведвальнікаў выведуць і вернуць грошы. Але, відаць, не ў гэтым сусвеце. Вельмі пашанцавала, што мы падышлі да клеткі і ўбачылі ўсё на ўласныя вочы. Калі б затрымаліся на паўхвіліны, уяўляю, як мая дачка, якая любіць сабак, пайшла б насустрач воўку.
Журналіст патэлефанаваў у адміністрацыю «Дукорскага маёнтка». Там пацвердзілі, што інцыдэнт з уцёкамі ваўчыцы сапраўды быў, і запэўнілі, што ніякіх няшчасных выпадкаў і скаргаў ад іншых наведвальнікаў не было.
— Нічога страшнага не адбылося і не магло. Ваўчыца таксама баіцца людзей. У выніку яе нават лавіць не давялося. Паклалі ў вальер ежу — хутка вярнулася сама.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі68
Каментары