У Віцебску спрабуюць прадаць раскошную камяніцу з эркерамі, якую за дзесяць гадоў давялі да поўнага разбурэння
Калісьці трохпавярховы дом вуліцы Камсамольскай быў упрыгажэннем Задзвіння, але за апошнія гады ператварыўся ў руіны проста на вачах гараджан. Цяпер небяспечную скрыню спрабуюць прадаць новаму ўласніку, але ахвотных браць на сябе адказнасць да даведзены да ручкі помнік архітэктуры няма.
Чарговая спроба прадаць будынак па вуліцы Камсамольскай, 28 адбудзецца ў канцы сакавіка 2026 года, аднак гісторыя папярэдніх аўкцыёнаў не дае шмат падстаў для аптымізму.
Ад раскошнай камяніцы да руіны
Будынак быў узведзены ў 1910‑я гады, як мяркуецца, па праекце гарадскога архітэктара Ціхана Кібардзіна. Гэта быў жылы дом, характэрны хутчэй для буйных гарадоў кшталту Санкт-Пецярбурга ці Вільні: з параднай лесвіцай па цэнтры і «чорнымі» ўваходамі з кухань. Яго архітэктура спалучае элементы розных стыляў: раслінны арнамент XIX стагоддзя тут суседнічае з формамі мадэрну, а пад вокнамі вылучаюцца ляпныя гірлянды з каласамі.
Дом перажыў дзве сусветныя вайны, і пасля аднаўлення ў 1950‑я гады ў ім жылі работнікі станкабудаўнічага завода. У 2010—2011 гадах ён быў прызнаны аварыйным, і жыхароў пачалі адсяляць.
Яшчэ ў 2016 годзе, як сведчаць панарамныя здымкі вуліцы, будынак выглядаў цалкам прыстойна: з дахам, цэлымі вокнамі і тынкоўкай на сценах. Аднак сапраўднае разбурэнне пачалося не ад узросту, а пасля таго, як дом трапіў у прыватныя рукі.
У 2015 годзе яго набыло ТАА «СК-ЕўраІнвест» амаль за чвэрць мільёна даляраў. Новы ўласнік анансаваў стварэнне гасцінічнага комплексу «Брыстоль». Да 2019 года будаўнікі нават разабралі дах і перакрыцці, пасля чаго работы спыніліся.
Без кансервацыі і часовага даху помнік архітэктуры застаўся адкрытым для ўздзеяння атмасферы і пачаў імкліва разбурацца. Сёння будынак хаваецца за будаўнічай сеткай: эркеры і тынкоўка са сцен пагражаюць абваліцца на галовы гараджан.
Аўкцыённы тупік
Цяперашняя спроба прадаць аб'ект — далёка не першая. У лютым 2026 года дом ужо выстаўляўся на таргі з пачатковай цаной 1 340 000 рублёў, але аўкцыён не адбыўся праз адсутнасць ахвотных.
Для новых таргоў, запланаваных на канец сакавіка, цану знізілі да 1 072 000 рублёў. Сёння продаж ажыццяўляе не сам уласнік, а органы прымусовага выканання — «БелЮрЗабеспячэнне». На маёмасць накладзены арышт і забарона на здзяйсненне рэгістрацыйных дзеянняў.
Акрамя ўласна будынка плошчай 853,8 кв.м, пакупнік атрымлівае права арэнды зямельнага ўчастка (да 2040 года), а таксама шэраг абмежаванняў, звязаных са статусам гісторыка-культурнай каштоўнасці. Значна ўскладняе сітуацыю тое, што новы ўласнік будзе вымушаны не толькі аднаўляць моцна пашкоджаныя цагляныя канструкцыі і ляпніну, частка якой незваротна страчана за гады стаянне без даху, але і нанова распрацоўваць праектную дакументацыю або дамаўляцца з папярэднім уласнікам аб яе перадачы.
Улады горада разглядаюць пытанне аб прымусовым адабранні аб'екта ў нядбайнага ўласніка і перадачы яго іншаму забудоўшчыку, аднак пакуль гістарычны будынак працягвае разбурацца на вачах, стаўшы сумным помнікам безгаспадарчасці.
«Наша Нiва» — бастыён беларушчыны
ПАДТРЫМАЦЬЦяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»21
Каментары