З 1 верасня ва ўсім мінскім наземным транспарце можна будзе разлічыцца карткай
У Мінску плануюць увесці магчымасць аплаты банкаўскай карткай ва ўсім наземным грамадскім транспарце да 1 верасня 2026 года. Пра гэта паведаміла намесніца старшыні камітэта эканомікі Мінгарвыканкама Вольга Лявошка, піша БелТА.
Такую сістэму ўжо часткова выкарыстоўваюць: у метро яна працуе даўно, а ў 2025 годзе яе тэставалі на асобных аўтобусных і тралейбусных маршрутах. Цяпер ідзе закупка неабходнага абсталявання для ўсяго транспарту.
Пасля поўнага запуску сістэмы плануецца адмяніць продаж білетаў у кіроўцаў. Гэта значыць, што аплаціць праезд можна будзе праз валідатар з дапамогай банкаўскай карты або іншымі безнаяўнымі спосабамі.
Яшчэ адна перавага — крыху меншая цана праезду. Зараз, калі купляць білет або аплачваць праз тэрмінал, праезд каштуе танней, чым пры аплаце ў кіроўцы. Пры рэгулярных паездках гэтая розніца можа быць адчувальнай.
Кантроль аплаты таксама будзе просты: пры праверцы пасажыр павінен прыкласці сваю картку да спецыяльнай прылады кантралёра, і сістэма пакажа, ці аплачаны праезд.
Акрамя таго, адной карткай можна аплаціць праезд адразу за некалькіх чалавек — сістэма проста зафіксуе некалькі аплат запар, і будзе лічыцца, што ўсе пасажыры едуць з квіткамі.
Каментары