На фоне ўкраінскіх паветраных атак Пуцін памяняў камандуючага Паветрана-касмічнымі сіламі
Прэзідэнт Расіі Уладзімір Пуцін прыняў рашэнне памяняць камандуючага Паветрана-касмічнымі сіламі краіны, у склад якіх уваходзяць войскі супрацьпаветранай і супрацьракетнай абароны. З 2023 года гэтую пасаду займаў генерал Віктар Афзалаў, а цяпер яго замяніў генерал-палкоўнік Аляксандр Чайко, піша The Moscow Times.
54‑гадовы Аляксандр Чайко ў канцы 2010‑х гадоў камандаваў расійскімі войскамі ў Сірыі, а з 2021 года ўзначальваў Усходнюю вайсковую акругу. Ён мае званне Героя Расіі. Паводле інфармацыі Еўрасаюза, асобу Чайко звязваюць з падзеямі ў Бучы, дзе расійскіх вайскоўцаў абвінавачваюць у масавых забойствах мірных жыхароў. У сакавіку 2026 года ЕС увёў супраць яго персанальныя санкцыі.
Змена камандавання расійскіх ВКС адбылася на фоне праблем з супрацьпаветранай абаронай. Апошнім часам Расія сутыкнулася з серыяй атак украінскіх беспілотнікаў, якія СПА аказалася няздольнай поўнасцю адбіць. У канцы сакавіка ўдары былі нанесеныя па буйных нафтавых партах на Балтыйскім моры, што прывяло да спынення экспарту нафты.
У красавіку атакі працягваліся: больш за 20 удараў прыйшліся па розных нафтавых аб’ектах, у тым ліку па некалькіх нафтаперапрацоўчых заводах, частка якіх была вымушаная спыніць працу. У выніку аб’ёмы перапрацоўкі нафты ў краіне знізіліся да мінімальнага ўзроўню з 2009 года.
Вылучаецца сітуацыя ў Туапсэ на Чорным моры, дзе порт і нафтаперапрацоўчы завод неаднаразова траплялі пад удары: у выніку гарэлі вялікія аб’ёмы нафты, а ў мора траплялі нафтапрадукты. Падобны інцыдэнт адбыўся і ў Пярмі ў канцы красавіка.
Праз пагрозу беспілотнікаў улады вымушаны былі нават змяніць фармат святкавання Дня Перамогі ў Маскве. Парад будзе скарочаны, пройдзе без вайсковай тэхнікі і працягнецца менш за звычайны час. Акрамя таго, будзе абмежаваны доступ на трыбуны — напрыклад, дэпутатаў Дзярждумы туды не дапусцяць.
Па вуліцах цяклі патокі палаючай нафты. Апакаліптычныя кадры з Туапсэ, дзе ўкраінцы нанеслі ўдар па НПЗ
Украінскія дроны трапілі ў яшчэ адно расійскае нафтасховішча
У расійскім курортным Туапсэ экалагічная катастрофа — пажар на НПЗ не могуць патушыць, ідуць нафтавыя дажджы
Зюганаў заявіў, што ўвосені ў Расіі можа адбыцца аналаг Лютаўскай рэвалюцыі 1917 года
Каментары