Пра гэта на прэс-канферэнцыі 5 ліпеня заявіў генеральны дырэктар беларускай кампаніі Аляксандр Бароўскі.
Паводле яго слоў, праца камісіі па стварэнні холдынгу працягваецца. «Ёсць яшчэ шмат пытанняў, у тым ліку па ацэнцы рызыкаў як беларускім, так і расійскім бокам. Я думаю, што да канца года мы аб’яднаемся», — сказаў Бароўскі.
Як заявіў 22 чэрвеня першы віцэ-прэм’ер Уладзімір Сямашка, Беларусь мае намер унесці ў холдынг «Расбелаўта» 75% акцый МАЗа мінус адна акцыя. Ён нагадаў, што была доўгая дыскусія з нагоды рыначнага кошту МАЗа. У выніку беларускае прадпрыемства ацэнена ў 1,1 млрд. долараў. Рыначны кошт расійскага КАМАЗа склаў 1,6 млрд. долараў. Сямашка падкрэсліў, што холдынгу «Растэхналогіі» належыць 49,9% акцый КАМАЗа. Разам з тым МАЗ на 100% належыць дзяржаве. Аднак першапачаткова аб’яднанне актываў у рамках холдынгу «Расбелаўта» меркавалася ажыццявіць на парытэтнай аснове.
«Як паказалі разлікі, калі КАМАЗ унясе 49,9% акцый, якія належаць дзяржаве, то МАЗу трэба ўносіць 75%, — сказаў першы віцэ-прэм’ер. — Але каб у нас быў уплыў на гэтыя працэсы, мы хочам 25% плюс адна акцыя пакінуць у Беларусі, а 75% мінус адна акцыя аддаць у холдынг. Тым самым мы дасягнем парытэтнасці бакоў. І тады рашэнні будуць прымацца кансэнсусам. І ніхто з удзельнікаў холдынгу не адчуе сябе ўшчэмленым». Сямашка падкрэсліў, што менавіта такая прапанова была зроблена расійскаму боку і на яго атрыманы станоўчы адказ. Такую схему аб’яднання ўхваліў і кіраўнік дзяржавы. «Значыць, думаю, холдынг будзе створаны на такіх умовах», — сказаў першы віцэ-прэм’ер.
Каментары