На сядзібе ТБМ прайшла творчая сустрэча з вакалістам легендарнага гурта «Палац».
На сядзібе Таварыства Беларускай Мовы ў Мінску прайшла творчая сустрэча з вакалістам легендарнага гурта «Палац» Алегам Хаменкам. Нягледзячы на спёку, на мерапрыемства завітала больш за 20 чалавек.
Сустрэча пад назвай «Дзяжурны па краіне» цягнулася болей за паўтары гадзіны – да моманту, пакуль над сталіцай не павісла пагроза навальніцы. Хаменка падымаў праблемы, якія яму асабліва баляць і пра якія, на яго думку, трэба пачаць гаварыць не толькі з сябрамі.
Трэба размаўляць
«У Беларусі не хапае ток-шоў ці проста сустрэчаў у фармаце, калі людзі фармуюць інтэрактыў.У нас пакуль такія размовы адбываюцца хіба што з сябрам ці святаром. З тае прычыны не абмяркоўваюцца і не ўдакладняюцца такія каштоўнасці, як «урад», «народ», «апазіцыя»… Урад нешта выясняе з народам, апазіцыя нешта выясняе з урадам, але стасункі не наладжваюцца, бо кожны паводзіць сябе так, як на сустрэчы з сябрам -- проста крычыць пра сваё. А паміж сабой трэба размаўляць і ўдакладняць тое, што незразумела – гэта падмурак, гэта важна».
Пра казкі
«Я багата збіраў беларускія казкі, вельмі мне яны падабаюцца, відаць, Гарынычы ў свой час паднадакучылі.Беларуская казка – грунтоўна-еўрапейская. У ёй няма вясёлых прыканцовак, вобразы вельмі пазнавальныя. У іх усё, як у жыцці. Той жа самы Церамок, дзе героі ў канцы сабе такі церам адбудавалі, як наша бібліятэка, у беларускай версіі (пра рукавічку) мае зусім іншую канцоўку. Тут прыйшоў мядзведзь, якога не пусцілі, а таму ён сеў на тую рукавічку і ўсіх падавіў. Вось дзе сэнс: усіх запускалі-запускалі, многа каго сабралі, а хочацца ж трапіць усім. А ўсім нельга змясціцца з той прычыны, што ўсё «каюкнецца». Такім чынам, паказваецца сапраўдная праблема Церамка – яна ў вавілоншчыне.
Ёсць у мяне ўлюбёная казка. Я знайшоў яе у чатырох ці пяці варыянтах, а калі гэтыя варыянты сабраў разам і перачытаў, зразумеў, нарэшце, пра што там было. Бо такія доўгія казкі мы ведаем толькі часткамі. Гэтая казка – «Салдат-лекар». Казка пра тое, як мы жывем, пра сэнс жыцця. Яна павінна выйсці у канцы верасня».
Дарэчы, восенню чакаецца і выхад новага альбома «Палаца».Прэзентацыя прымеркаваная таксама да 20-годдзя гурта, адбудзецца ў апошнюю суботу кастрычніка. Алег Хаменка кажа, што будзе эксклюзіўная праграма, праўда, заля, якая пакуль не называецца, не змесціць вялікай колькасці людзей. Таму ўсім ахвочым пабываць на мерапрыемстве трэба спяшацца набываць квіткі.
Творчая сустрэча з Алегам Хаменкам скончылася аўтограф-сесіяй і прыватнымі абмеркаваннямі з музыкам тэмаў, набалелых прысутным.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі73
Каментары