Віншуем дашкалятаў!
За апошнія 3--5 гадоў сярод беларускай інтэлігенцыі адбыўся сапраўдны baby bооm. Яшчэ ўзімку беларускіх садкоў у цэнтры Менску фактычна не існавала.
Мара беларуса. Садок у самым цэнтры схаваўся за зелянінаю дрэваў. Ласкавыя выхавацелькі размаўляюць выключна па-беларуску (вось толькі з ангельскай мовай малечу знаёмяць). Дзеткі рознага веку нагадваюць вялікую й шумную сям’ю (у іх крыху нязгода з рэжымам дня, як у іхных бацькоў з “рэжымам”). Гэта дзеці палітыкаў, музыкаў, мастакоў, журналістаў… Лепшых людзей Беларусі.
Мара… Яна амаль збылася. Пакуль што гэта толькі адна група ў адным зь лепшых садкоў Цэнтральнага раёну. У пятніцу 22 верасьня гэтыя дзеткі адзначаюць сваё першае сьвята — адкрыцьцё групы.
Арганізаваць такую групку аказалася на дзіва проста. Але праблемаў хапае. Дзяржаўны садок атрымлівае мала грошай зь бюджэту. Нягледзячы на ўсе намаганьні бацькоў правесьці паўнавартасны рамонт, набыць больш якасную мэблю, забясьпечыць дзяцей фарбамі, кніжкамі, аўдыёкасэтамі – на ўсё гэта трэба грошай. Таму група №3 садка №314 (вул.Багдановіча, у дварах за кнігарняй “Маладосьць”) просіць дапамогі й шукае спонсараў (разавых і сталых).
Бяда і з кадрамі. Садку тэрмінова патрабуюцца нянька й выхавацелька. Спрадвечнае гора беларускай інтэлігенцыі: ёсьць каму казаць прамовы, няма каму мыць гаршкі.
Беларускамоўныя дзеткі чакаюць дапамогі. Садок ужо працуе. У сьпісе пакуль што 17 імёнаў. Хто ведае, мо гэтыя імёны варта запомніць?
Крысьціна Пучынская
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»22
Каментары