простая мова
Міраслаў Адамчык: “Я на баку дзяржаўных інтарэсаў”
У мінулым нумары “НН” мы надрукавалі інфармацыю, атрыманую з нашых крыніцаў у холдынгу, пра тое, што галоўная рэдактарка часопісу “Всемирная литература” Таіса Бондар сышла ў адстаўку, а в.а. галоўнага рэдактара прызначаны Міраслаў Адамчык. Мы зьвярнуліся па камэнтар да самога М.Адамчыка, які гэтым часам знаходзіцца ў Маскве.
Міраслаў Адамчык: Я быў запрошаны на сустрэчу зь Сяргеем Касьцянам. Гаворка ішла пра той цяжкі стан, у якім апынулася выдавецкая справа ў Беларусі. У прыватнасьці, абмяркоўваліся часопіс “Всемирная литература” і тыднёвік “ЛіМ”. Мяне зьдзівіла і ўзрадавала жаданьне спадара Касьцяна перавесьці “Всемирную литературу” на беларускую мову. У нас страшэнна бракуе добрых перакладаў клясычных твораў сусьветнай літаратуры, для ўключэньня іх у падручнікі і хрэстаматыі. Мне прапанавалі сур’ёзна падумаць над плянамі часопісу “Сусветная літаратура”, чым я і займаюся.
“НН”: Пра холдынг “Літаратура і мастацтва” выказваюцца розныя меркаваньні…
М.А.: Ня варта зьдзіўляцца рэформам, якія даўно насьпелі ў часопісах і ў Саюзе пісьменьнікаў. Крызыс непасрэдна адбіваўся і на выданьнях, якія юрыдычна належалі яму, хоць фінансаваньне мелі дзяржаўнае. У дадзенай сытуацыі я адназначна на баку дзяржаўных інтарэсаў. Непрыстойна атрымліваць дзярждатацыі і, мякка кажучы, ігнараваць дзяржаўную палітыку.
“НН”: А свабода творчасьці?
М.А.: У вольны ад працы час можна пазаймацца і свабоднай творчасьцю, толькі ў мяне амаль няма вольнага часу.
“НН”: Ці праўда, што Вашым намесьнікам будзе Максім Клімковіч, унук Міхася Клімковіча — аўтара дзяржаўнага гімну?
М.А.: А дзе вы бачылі, каб рэдактар прыходзіў у часопіс без каманды? Большасьць сваіх раманаў і п’ес я напісаў у суаўтарстве з Максімам, таму і пляны абмяркоўваю менавіта зь ім. Максім — выдатны прафэсіянал, які больш за 20 гадоў працуе ў дзяржаўных СМІ. Разам мы зрабілі не адзін часопіс, і, калі нам прапануюць ажыцьцявіць нашы пляны, мы іх зьдзейсьнім.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі69
Каментары