У Мінску распачаўся сезон фантанаў
У апошні дзень красавіка ў Мінску запрацавалі гарадскія фантаны.
Першым заструменіў адзін з самых вялікіх фантанаў, што знаходзіцца ў скверы ля Вялікага тэатра оперы і балета. У гэтым годзе на пляцоўцы граў аркестр «Няміга», выступалі творчыя калектывы, гараджан і гасцей Мінска таксама чакала невялікае піратэхнічнае шоу.
Найстарэйшы фантан сталіцы — «Хлопчык з лебедзем», ён знаходзіцца ў Аляксандраўскім скверы. Найбольшая колькасць струмянёў у фантана на плошчы Незалежнасці. А самы магутны — «Ветразь» у Парку 50-годдзя Кастрычніка. Усяго ў Мінску дзейнічае каля 30 фантанаў.