Лукашэнка — Лаўрову: У пачатку восені трэба звярнуцца да пытанняў нашых адносін у фармаце саюзнай дзяржавы
У адносінах Беларусі і Расіі няма асаблівых праблем ні на самым высокім узроўні, ні на ўзроўні міністэрстваў замежных спраў.
Аб гэтым заявіў Аляксандр Лукашэнка 16 чэрвеня на сустрэчы з міністрам замежных спраў Расіі Сяргеем Лаўровым, паведамляе прэс-служба беларускага кіраўніка.
Лукашэнка адзначыў, што паспяхова рэалізуецца двухбаковая праграма ўзгодненых дзеянняў у галіне знешняй палітыкі дзяржаў — удзельніц дагавора аб Саюзнай дзяржаве, разлічаная на 2014—2015 гады, мерапрыемствы якой выконваюцца дакладна і ў тэрміны. «Упэўнены, што яна будзе рэалізавана так, як павінна быць у адносінах нашых брацкіх дзяржаў. Тыя праблемы, якія існуюць, мы вырашаем у нармальным рэжыме», – сказаў кіраўнік дзяржавы.
«Думаю, трэба ў бліжэйшы час, як складуцца абставіны, магчыма, у пачатку восені, звярнуцца да пытанняў нашых адносін у фармаце Саюзнай дзяржавы.
Думаю, як мінімум урады павінны сабрацца і правесці сумесны Саўмін, каб адрэгуляваць некаторыя праблемы, асабліва ў сувязі з дзейнасцю Еўразійскага эканамічнага саюза, — адзначыў Лукашэнка. — Думаю, гэта размова двух урадаў дасць сігнал і трэцяму боку для таго, каб на такім жа ўзроўні паглядзелі на некаторыя праблемы, якія, магчыма, узнікнуць да пачатку восені ў сувязі з функцыянаваннем новага эканамічнага саюза».
Аляксандр Лукашэнка лічыць гэты візіт кіраўніка расійскага МЗС своечасовым.
«У сувязі з многімі праблемамі, якія вакол нас, — гэта своечасовая сустрэча, і нам важна зверыць гадзіннікі», — сказаў Лукашэнка. Ён падкрэсліў, што гатовы абмеркаваць любыя пытанні і прыняць рашэнне, калі гэта неабходна.