АТА: Мы не ведаем, ці была сярод затрыманых жанчын-снайпераў беларуска
У прэс-службе сіл Антытэрарыстычнай аперацыі не здолелі пацвердзіць факт затрымання апалчэнкі з Беларусі Наталлі Красоўскай.
Па словах прадстаўніка прэс-службы АТА Аляксея Дзмітрашкоўскага, яны нацыянальнасць затрыманых сепаратыстак не ўдакладнялі.
«Сапраўды, былі затрыманыя гэтыя жанчыны, нібыта снайпершы, але хто з іх хто я не ведаю: гэту інфармацыю зараз могуць даць толькі ў СБУ — пасля затрымання іх перадалі туды і там з імі працуюць».
Але ў СБУ на тэлефанаванні не адказваюць. Не маюць інфармацыі, ці была сярод затрыманых жанчын беларуска і ў МЗС Беларусі.
Нагадаем, 6 ліпеня стала вядома пра затрыманне ўкраінскімі вайскоўцамі каля гары Карачун трох жанчын-баевікоў. Мяркуючы па фота, у цэнтры стаіць жанчына, падобная да Наталлі Красоўскай, ураджэнкі Барысава, якая фігуравала на адным з прапагандысцкіх відэа, знятых расійскімі журналістамі.