КХП-БНФ адмовілася ад акцыі 25 сакавіка ў Кіеўскім скверы
Як паведаміў Свабодзе намесьнік старшыні партыі КХП-БНФ Юрась Беленькі, гэта зьвязана з тым, што гарадзкія ўлады да гэтага часу не далі адказу на заяўку.
Юрась Беленькі быў выкліканы ў Менгарвыканкам яшчэ 20 сакавіка, але гарадзкія ўлады адмянілі сустрэчу, паведаміўшы, што «адказ заяўнік атрымае пазьней у вызначаным законам парадку».
Не дачакаўшыся ні адказу па пошце, ні новага запрашэньня ў Менгарвыканкам, актывісты адмовіліся ад арганізацыі вулічнага мерапрыемства.
Акрамя гэтага, прадстаўнікі КХП-БНФ накіравалі ў Генэральную пракуратуру скаргу з патрабаваньнем завесьці крымінальную справу па факце чыненьня перашкодаў масаваму мерапрыемству.