Пасля блакавання «Хартыі'97» у Беларусі ўскладніўся доступ да папулярных ананімайзераў
а ў вас яны адкрываюцца?
Ужо два тыдні ў Беларусі заблакаваны сайт «Хартыя'97». Але многія сталыя чытачы працягваюць наведваць яго, выкарыстоўваючы ананімайзеры — сэрвісы, якія дазваляюць трапіць на патрэбны рэсурс абыходным шляхам.
Між тым апошнімі днямі беларусы сталі заўважаць, што некаторыя папулярныя ананімайзеры перасталі адкрывацца. Старонкі з такімі сайтамі спачатку працяглы час беспаспяхова загружаюцца, пасля чаго браўзэр выдае паведамленне аб тым, што сервер не адказвае. Гэта кажа пра тое, што афіцыйна ананімайзеры ўсё ж не заблакаваныя.
Але на момант напісання артыкула мы не змаглі трапіць на наступныя папулярныя бясплатныя сайты-ананімайзеры:
- cameleo.xyz / cameleo.ru
- noblockme.ru
- 4everproxy.com
Усе яны знаходзяцца ў топе пошукавых запытаў.
Ці могуць улады праз правайдэраў ускладняць доступ да гэтых сайтаў?
Паводле праграміста Севы Шашарына, да якога мы звярнуліся па каментар, гэта магчыма: спосабаў для ўскладнення доступу існуе шмат, і галоўнае тут — фантазія.
«Але можа быць і такое, што беларусы раптам масава пачалі карыстацца гэтымі ананімайзерамі, і іх адміністратары адключылі доступ для нашага рэгіёна, каб пазбегнуць перагрузкі сайта», — сказаў спадар Шашарын.
Нагадаем, рашэнне аб блакіроўцы сайта «Хартыя'97» было прынята Міністэрствам інфармацыі. У паведамленні ведамства сцвярджалася, што на рэсурсе публікаваліся матэрыялы, «якія змяшчаюць інфармацыю, распаўсюд якой здольны нанесці шкоду нацыянальным інтарэсам Беларусі».