У аэрапорце затрымалі расіяніна з падробленым малдаўскім пашпартам
6 чэрвеня чалавек з малдаўскім пашпартам спрабаваў вылецець у Франкфурт з мінскага аэрапорта. Але памежнікі заўважылі, што асноўная старонка пашпарта была надрукавана звычайным прынтарам. Высветлілася, што ўладальнік дакумента з'яўляецца расіянінам і знаходзіцца ў вышуку, паведамляе Дзяржпагранкамітэт.
Устаноўлена, што ў Нямеччыну пад выглядам грамадзяніна іншай краіны спрабаваў вылецець 45-гадовы расіянін. На радзіме ён знаходзіцца ў вышуку.
Замежны грамадзянін затрыманы. Распачаты адміністрацыйны працэс за замах на парушэнне мяжы і правіл знаходжання ў Беларусі.
Таксама распачата праверка з-за падазрэнняў у падробцы дакументаў.