«Жыватворны агонь» сышоў у Іерусаліме ФОТЫ ВІДЭА. Крытыкі асуджаюць гэтае «з'яўленне» як фальсіфікацыю
У Вялікую суботу ў Іерусаліме ў Храме Труны Гасподняй сышоў Жыватворны агонь. Патрыярх Ерусалімскі Феафіл III 27 красавіка выйшаў з капліцы з запаленымі свечкамі. Пасля гэтага прысутныя ў святыні запалілі свечкі ад яго агню.
Далей вернікі спецрэйсамі павязуць полымя гэтага агню ў свае краіны, перадае АНТ.
Жыватворны агонь сыходзіць у капліцу над Труной Гасподняй — Кувуклію. Падрыхтоўка да цырымоніі пачынаецца з раніцы. Спачатку капліцу аглядаюць і апячатваюць.
Апоўдні ад Іерусалімскай патрыярхіі пачынаецца Хросны ход да Труны Гасподняй. У храме знаходзіцца лампадка, куды сыйдзе Жыватворны агонь, і 33 свечкі, якія сімвалізуюць 33 гады зямнога жыцця Ісуса Хрыста.
Пасля гэтага ў капліцу ўваходзіць Іерусалімскі патрыярх. Ён здымае сваю вопратку і застаецца ў палатняным падрасніку, каб было відаць, што ў яго няма ніякага прыстасавання для запальвання агню. Уваход у Кувуклію зноў апячатваецца, і людзі моляцца ў чаканні сыходжання агню.
Вернікі лічаць, што калі агонь не сыдзе, то гэта будзе азначаць пачатак апошніх часоў — канца свету.
Крытыкі асуджаюць «з'яўленне Жыватворнага агню» як фальсіфікацыю. На іх думку, крыніцу агню проста хаваюць у Кувукліі.