Рэчы ляжалі на мосце праз Дняпро, але цела нідзе няма: што вядома пра таямнічае знікненне жанчыны ў Оршы
Уначы 12 красавіка 53-гадовая аршанка Жанна Батурэнка выйшла з хаты. Было каля першай гадзіны ночы. Больш жанчыну ніхто не бачыў.
На наступны дзень пачаліся пошукі.
Адзенне Жанны знайшлі на мосце праз Дняпро.
«Ніхто нічога не ведае і не разумее, што адбылося, — распавёў «Нашай Ніве» сваяк жанчыны. — Яна кудысьці з’ехала? Здзейсніла суіцыд? Інсцэніравала суіцыд? Мы не ведаем, нават версій няма. Але запіску яна не пакінула — проста знікла і ўсё».
Псіхічных хвароб ці праблем з алкаголем жанчына не мела. Працавала прадавачкай у адной з мясцовых крамаў, дзе гандлявала тканінай і адзеннем. Жыла з мужам.
Але ж вядома, што мінулым летам у Жанны загінуў сын — хлопцу было 30 гадоў. «Паехаў на рыбалку, стала кепска — і ўсё, — кажа сваяк. — Напэўна, сэрца».
Жанна цяжка перанесла страту. Але ж ці звязана яе знікненне са смерцю сына, таксама ніхто не можа сказаць.
Пакуль што пошукі працягваюцца.