У польскіх Татрах загінуў 22-гадовы хлопец з Беларусі
абноўлена
У польскіх Татрах знайшлі мёртвым маладога хлопца з Беларусі Змітра Краўцова. Ён пайшоў у горы ў панядзелак, 3 ліпеня. Татранская валанцёрская служба абвяшчала пра пошук яго.
Зміцер Краўцоў. Фота з Facebook
22-гадовага Змітра Краўцова з аўторка шукалі ратавальнікі.
Тады ж у мясцовай горнай супольнасці карыстальнікі скардзіліся на «смецце», знойдзенае каля адной з альпінісцкіх трас у скалах Татр: заплечнік, дзве пары мужчынскага абутку, вяроўка, кепка і іншыя асабістыя рэчы.
Дасведчаныя турысты адзначылі, што гэта не звычайнае кінутае смецце, а нечы заплечнік, які растрыбушылі птушкі. У каментарах да публікацыі пра пошук беларуса карыстальнікі згадалі пра гэты выпадак і выказалі асцярогі, што гэта маглі быць рэчы Краўцова.
Бліжэй да поўдня Змітра знайшлі мёртвым, як паведаміла 24tp.pl. Ратавальнікі з дапамогай верталёта перавезлі цела хлопца да бальніцы ў Закапанэ.
Як паведамляе PAP, Зміцер пакінуў машыну на паркінгу на Лысай паляне. Па словах яго знаёмых, ён адправіўся ў горы адзін.
Калі хлопец не вярнуўся, яго знаёмая забіла трывогу. У аўторак увечары ратавальнікі пачалі шукаць беларуса з дапамогай дронаў. Сёння раніцай пачаліся маштабныя пошукі з верталётам.
Зміцер Краўцоў спыніўся ў Кракаве. Падобна, ён не так даўно пераехаў у Польшчу, як звярнула ўвагу «Люстэрка». Тыдзень таму, 27 чэрвеня, Зміцер размясціў у мясцовай групе допіс пра тое, што шукае працу ў сферы гастраноміі ці ў клубе, гатовы працаваць у любы час сутак і выхадныя, мае досвед працы афіцыянтам і менеджарам, але валодае польскай пакуль на самым пачатковым узроўні.