У Генштабе патлумачылі, у якіх узброеных канфліктах краіну будуць пераводзіць на «вайсковыя рэйкі», а ў якіх не
Класіфікацыя канфліктаў дазваляе правільна рэагаваць на рызыкі, выклікі і пагрозы, патлумачыў у эфіры СТБ намеснік начальніка Генеральнага штаба па навуковай рабоце Узброеных Сіл Беларусі Віктар Тумар.
Намеснік начальніка Генеральнага штаба па навуковай рабоце Узброеных Сіл Беларусі Віктар Тумар
Паводле Тумара, вайсковы канфлікт уключае ў сябе ўзброены канфлікт.
Узброены канфлікт можа быць міждзяржаўны і ўнутраны.
А бывае вайна — міждзяржаўная і кааліцыйная. Гэта ўжо сацыяльная буйная зʼява, калі будуць задзейнічаны ўсе сілы дзяржавы для адбіцця непасрэдна агрэсіі, кажа Тумар.
«Узброены канфлікт можна разглядаць як пэўны інцыдэнт, які трэба купіраваць у тым ці іншым месцы», — тлумачыць ён.
Паводле яго, кожны ўзброены канфлікт — наступны ўзровень выцякае з папярэдняга. Але «магчыма такое, што можа пераскокваць у рамках хуткай эскалацыі абстаноўкі».
«І вось гэтая класіфікацыя дазваляе нам правільна рэагаваць на рызыкі, выклікі і пагрозы. Пры гэтым правільна размяркоўваць сілы і не ўцягваць дзяржаву адразу ж: не ставіць эканоміку на вайсковыя рэйкі, не ладзіць нейкіх мабілізацый, а купіраваць своечасова і правільна. Эфектыўна выкарыстоўваць сілы і сродкі Узброеных Сіл», — патлумачыў Тумар.