Дырэктарка турфірмы, якая не пазнала беларускай мовы, вырашыла адсудзіць 37 тысяч даляраў. Але праз некалькі гадзін перадумала
Гісторыя вакол дырэктаркі мінскай турфірмы «На вышыні» Ірыны Дуброўскай, якая не пазнала беларускай мовы і адхапіла за гэта хвалю хейту і крытыкі ў сацсетках, атрымала працяг.
Скрыншот з эфіру СТБ
Дуброўская заявіла, што падае ў суд і агучыла прэтэнзіі да карыстальніцы Трэдса на 37 545 даляраў. Маўляў, менавіта на такую суму яна страціла кантракты з-за яе паста. Аднак праз некалькі гадзін Дуброўская перадумала.
У чым сутнасць
Усё пачалося з паста ў Трэдс. Ірына Дуброўская апублікавала фота ўпрыгожанага Мінска да Дня яднання Беларусі і Расіі.
У каментарах ёй задалі пытанне па-беларуску — ці так жа ўпрыгожана Масква.
У адказ яна па-руску напісала:
«Я не ведаю вашай мовы. Пішыце на беларускай ці рускай».
Скрыншоты гэтага адказу разышліся па сацсетках. Каментар дырэктарка турфірмы хутка выдаліла, але абмеркаванне працягнулася, а сама Дуброўская ўключылася ў спрэчкі і пачала актыўна адказваць крытыкам.
Гэта толькі павялічыла ўвагу да гісторыі і ператварыла адзін каментар у інтэрнэт-скандал.
Пагроза судом
Праз некалькі дзён пасля гэтага Дуброўская вырашыла, што гэтая гісторыя нанесла шкоду яе бізнэсу, і хутка знайшла «вінаватую».
Адна з дзяўчат, якая першай апублікавала скандальны скрыншот, атрымала асабістае паведамленне:
«Пададзены пазоў аб прычыненні шкоды дзелавой рэпутацыі і страты кантрактаў на 37 545 у.а. Бліжэйшым часам вам павінна прыйсці паведамленне ў суд».
І далей:
«Калі вырашылі папіярыцца за мой кошт, мае юрысты проста напісалі пазоў».
Паралельна Дуброўская публічна выказала сваю пазіцыю ў Трэдс:
«Вашымі дзеяннямі нанесена шкода маёй кампаніі. Кожны крок мае свае наступствы. Вы вырашылі папіярыцца за кошт маёй кампаніі, якую я выбудоўваю 8‑ы год запар? Ну давай».
Дзяўчына, якая посціла скрыншот з яе адказам, адказвае стрымана:
«Я ўвогуле не ведаю вашу кампанію і не піярылася. Я выклала агульнадаступны пост і каментары без персанальных даных».
Што адбываецца ў каментарах
Тым часам карыстальнікі Трэдс сталі на бок дзяўчыны, якая выклала пост. Хтосьці іранізуе:
«То бок непісьменная яна, а вінаватыя вы?»
Хтосьці ставіць пад сумнеў іск:
«У пасце бізнэс не згадваўся».
Іншыя адкрыта высмейваюць сітуацыю:
«Сама зняславілася, сама выставілася на ўсеагульны агляд, сама пакрыўдзілася».
«Калі зняславілася ў інтэрнэце, але гэтага было недастаткова і вырашыла зняславіцца яшчэ і ў жыцці».
Сама Дуброўская на крытыку адказвае лаканічна: «Суд вырашыць».
І працягвае ўступаць у спрэчкі:
«Вы па іску ні адказнік, ні сведка. Проста рохкнулі ў трэдс».
Ёсць нюанс
Праз некалькі гадзін пасля гучных заяў пра суд Дуброўская раптам змяніла тон. Адхапіўшы новай крытыкі, у каментарах яна напісала:
«Я ўжо напісала ёй, што не будзе ніякага пазову. Мне няма калі».
І дадала доўгі эмацыйны пасаж пра тое, што «перш чым «забіваць» бізнэс», трэба «стварыць свой і пагаварыць праз 5 гадоў».
Пры гэтым сама Дуброўская кажа, што скандал пайшоў ёй нават на карысць:
«У мяне ніколі не было такога аншлагу па заяўках. Дзякуй, трэдс».