«Інкрымінавалі «здраду дзяржаве», а ён сам проста абстукваў колы ў цягнікоў»
Былы палітзняволены Ігар Лосік, калі дазнаўся пра сённяшні хапун ў мінскім офісе архітэктурнай студыі ZROBIM architects, узгадаў падобны выпадак, які адбыўся з адным з ягоных аднакамернікаў.
Фота ілюстрацыйнае
«Калі я сядзеў у СІЗА КДБ, са мной у камеры сядзеў чыгуначнік Канстанцін Міхайлоўскі. Ён расказваў, што ў снежні 2024 года ў чыгуначным дэпо адбыўся такі самы «хапун», затрымалі 52 чалавекі. Праца дэпо цалкам спынілася.
Людзям інкрымінавалі «здраду дзяржаве», а ён сам проста абстукваў колы ў цягнікоў. Высветлілася, што ў іх там калісьці працаваў нейкі чалавек, які з'ехаў у Польшчу і ўступіў у «Рабочы рух» (паводле версіі следства).
І ўсіх, хто з ім камунікаваў, перапісваўся ці проста працаваў калісьці разам, тупа затрымалі. Косця проста сядзеў без следчых дзеянняў, не разумеючы за што і з перспектывай атрымаць мінімум 10 гадоў».
Нагадаем, што сілавікі прыйшлі ў офіс ZROBIM architects, размешчаны ў Мінску, 9 красавіка каля 11‑й гадзіны раніцы.
Паводле наяўнай інфармацыі, былі затрыманыя ўсе супрацоўнікі, якія ў той момант знаходзіліся на працоўных месцах. Гаворка ідзе прыкладна пра 50 чалавек. Сярод затрыманых нібыта і сузаснавальнік — Андрэй Макоўскі.
Прычыны цікавасці сілавікоў да адной з самых вядомых і паспяховых архітэктурных студый Беларусі на гэты момант невядомыя.
Чытайце таксама:
У мінскі офіс архітэктурнай студыі ZROBIM architects прыйшлі сілавікі
Лосік расказаў, як эпічна спаліўся падсадны арыштант у камеры СІЗА КДБ
Лосік расказаў, праз якія пакуты прайшоў музыка Tor Band Яўген Бурло