Сталі вядомыя падрабязнасці булінгу гродзенскага школьніка
Сталі вядомыя падрабязнасці жорсткіх здзекаў з вучня ў адной са школ Гродна, якога падлеткі падвесілі ў туалеце і здымалі гэта на відэа, паведамляе тэлеканал «Гродна Плюс».
Раней паведамлялася, што ў адной са школ Гродна здарыўся выпадак жорсткага булінгу: група падлеткаў здзекавалася са свайго аднагодка і здымала гэта на відэа.
Паводле слоў пацярпелага, усё пачалося ў школьным туалеце, дзе знаходзіліся трое падлеткаў. Спачатку яны пачалі яго хапаць і цягнуць за гумку ад трусоў. Хлопцу ўдалося вырвацца і выбегчы, але яго дагналі, зноў занеслі ў туалет і ўжо там утрох паднялі і падвесілі на кручок за тую ж гумку (раней паведамлялася, што за партфель).
Па словах хлопца, ён пытаўся, навошта яны гэта робяць, але ў адказ тыя толькі смяяліся і працягвалі здымаць усё на тэлефон.
Пасля гэтага падлеткі пайшлі, пакінуўшы яго аднаго. Хлопец сцвярджае, што правісеў у бездапаможным стане каля 20—30 хвілін, пакуль не змог самастойна вызваліцца.
Пра здарэнне дарослыя даведаліся выпадкова. У той дзень бацьку выклікалі ў школу па іншай прычыне, і спачатку падумалі, што сын проста ўцёк з урока. Толькі потым высветлілася, што ён увесь гэты час знаходзіўся ў туалеце пасля здзекаў.
Сам школьнік доўга не хацеў нічога расказваць, бо яму было сорамна. Ён нават не збіраўся паведамляць пра гэта, бо лічыў, што скардзіцца ў такой сітуацыі «не па-пацанску».
У выніку ў дачыненні да ўдзельнікаў інцыдэнту складзеныя адміністрацыйныя пратаколы за дробнае хуліганства. Справы 14‑ці і 17‑ці гадовых падлеткаў будуць разглядацца камісіяй па справах непаўналетніх, а 18‑гадовага ўдзельніка чакае суд.
Чытайце таксама:
У Гродне трое школьнікаў здзекаваліся з іншага падлетка: падвесілі за партфель у прыбіральні