У Пхеньяне адкрылі помнік салдатам КНДР, якія загінулі ў Курскай вобласці
На мерапрыемстве прысутнічаў лідар КНДР Кім Чэн Ын, а таксама міністр абароны Расіі Андрэй Белавусаў і кіраўнік Дзярждумы Вячаслаў Валодзін.
Фота тут і далей KCNA
У нядзелю ў Пхеньяне ўлады КНДР правялі ўрачыстую цырымонію адкрыцця помніка паўночнакарэйскім вайскоўцам, якія загінулі ў баях у Курскай вобласці. Таксама быў адкрыты «Мемарыяльны музей баявых подзвігаў у замежнай ваеннай аперацыі», паведамляе Паўночнакарэйскае тэлеграфнае агенцтва.
На мерапрыемстве прысутнічаў лідар КНДР Кім Чэн Ын, міністр абароны краіны Но Гван Чхор і іншыя высокапастаўленыя чыноўнікі. З Расіі на мерапрыемства прыбылі кіраўнік Мінабароны Андрэй Белавусаў і спікер Дзярждумы Вячаслаў Валодзін.
Апошні таксама зачытаў зварот Пуціна, у якім гаварылася, што паўночнакарэйскія вайскоўцы, якія змагаліся ў Курскай вобласці, «назаўсёды застануцца ў сэрцы кожнага грамадзяніна Расіі».
Паводле звестак паўднёвакарэйскай разведкі, у баях на баку Расіі загінулі і атрымалі раненні каля шасці тысяч вайскоўцаў з КНДР, але гэтыя даныя могуць быць завышаныя.
Пры гэтым у прыфрантавой зоне могуць па-ранейшаму знаходзіцца тысячы паўночнакарэйскіх салдат.