Цэнтр абароны персанальных звестак лічыць, што ДАІ з «табло ганьбы» парушае закон
Нацыянальны цэнтр абароны персанальных даных паставіў пад сумнеў законнасць працы новай інтэлектуальнай сістэмы ДАІ, якая публічна дэманструе рэгістрацыйныя нумары аўтамабіляў-парушальнікаў на прыдарожных табло.
Тэхналогія аўтаматычнай фіксацыі парушэнняў на трасе Р-53 ад Жодзіна да Кургана Славы выклікала пытанні ў юрыстаў, расказвае АНТ.
Сутнасць канфлікту палягае ў прававым статусе дзяржаўнага нумара транспартнага сродку. Згодна з беларускім заканадаўствам, гэтыя звесткі адносяцца да персанальных даных, а іх распаўсюд без згоды ўладальніка абмежаваны.
Начальнік упраўлення кантролю і аўдыту Нацыянальнага цэнтра абароны персанальных даных Беларусі Віталь Дзіско пацвердзіў, што яны падрыхтавалі афіцыйны ліст з патрабаваннем удакладніць прававыя падставы для такой апрацоўкі інфармацыі.
Новая сістэма выкарыстоўвае штучны інтэлект для выяўлення розных тыпаў парушэнняў: перавышэння хуткасці, адсутнасці тэхагляду, непрышпіленага рамня бяспекі і выкарыстання тэлефона за рулём. Абяцаюць сачэнне і за жартаўлівыя налепкі на аўто.
Звесткі пра парушальніка выводзяцца на агульны агляд на спецыяльнае табло.
У ДАІ заяўляюць, што метад мае выхаваўчую мэту, і эксперымент стане пастаяннай практыкай.