У сталіцы Літвы абвяшчалі паветраную трывогу
У Ігналінскім, Уцянскім, Свянцянскім, Езяроскім раёнах і ў Вільні абвяшчлася паветраная трывога з-за меркаванага дрона, заўважанага ў Беларусі каля літоўскай мяжы.
«Прычына — на тэрыторыі Беларусі паблізу мяжы Літвы ў цяперашні час назіраецца радыёлакацыйная адзнака з прыкметамі, характэрнымі для беспілотных лятальных апаратаў. З літоўскага боку былі задзейнічаны знішчальнікі, якія выконваюць місію паветранай паліцыі НАТА», — паведамляе армія Літвы.
Жыхары гэтых раёнаў атрымалі на тэлефоны паведамленні пра паветраную пагрозу. Ім рэкамендавалі перайсці ў сховішча ці трымацца далей ад акон.
Была закрытая паветраная прастора над Вільняй, спыніўся грамадскі транспарт. У сховішчы перамясцілася і кіраўніцтва краіны.
Прыкладна праз паўгадзіны жыхары атрымалі паведамленне «Адбой паветранай трывогі».
Гэта была першая паветраная трывога ў сталіцы еўрапейскай дзяржавы за апошнія дзесяцігоддзі.