«Чакалі 2 гады. Віза — на 9 дзён». Як беларусы цяпер прабіваюцца ў Еўропу

Віза для беларусаў пасля 2022‑га — гэта цяжка, доўга ці дорага, нярэдка ўсё разам. Умовы квэсту змяняюцца, але пераважна не ў лепшы бок. Выданне Devby.io сабрала апдэйты і кейсы 2026 года.

Здымак ілюстрацыйны. Фота: «Наша Ніва»

Эксперты: праз Іспанію «рызыка адмовы мінімальная», а амбасада Італіі — «самая шчодрая»

Візавыя эксперты ў Threads раяць падацца праз Іспанію, бо «рызыка адмовы мінімальная». Пры гэтым запісацца можна цягам 1‑2 месяцаў, разгляд дакументаў зойме да 6 тыдняў, а візу дадуць на 1‑3 месяцы.

Амбасада Італіі — таксама варыянт, на думку аднаго з карыстальнікаў сацсеткі. Яна «самая шчодрая»: у чысты пашпарт ставіць візы на 3‑6 месяцаў (хоць і даты пад паездку таксама бываюць), калі ёсць пацвярджэнне знаходжання ў Італіі, могуць на 1‑3 гады даць. Дакументы разглядаюць 2 тыдні. Аднак падача магчымая, калі ёсць нумар у жывой чарзе.

А вось нямецкая амбасада «стала ставіць дрэнна»: «нават калі ёсць пацвярджэнне, што людзі ездзілі раней у Германію, даюць пад паездку або на 3 месяцы, радзей — ад паўгода да двух гадоў». Пры гэтым чакаць падачы давядзецца 15‑18 месяцаў.

Яшчэ адзін візавы эксперт таксама адзначае, што самы хуткі і недарагі варыянт цяпер — праз Грэцыю, лепш пад тур, але «гарантый атрымання няма» і ў гэтым выпадку. Хоць «у сезон адмоў менш».

Іспанцы, паводле яго слоў, адкрываюць першую візу ў сярэднім на 30 дзён, наступную — на 3 месяцы, і так па ўзрастаючай. Але і ад іх можна чакаць сюрпрызаў. «Як пашанцуе» адкрываюць і французы.

Нямецкі шэнген: «Чакала даты на падачу з кастрычніка 2024 года, атрымала ў красавіку»

Іна чакала даты на падачу на нямецкую візу з кастрычніка 2024 года, атрымала ў красавіку — на год.

«Падача ўжо ў амбасадзе была нескладанай: мы прыдумалі маршрут, пераклалі ўсё на нямецкую — і прыйшлі з поўным пакетам дакументаў. Таксама да яго прыклалі чэкі з папярэдняй паездкі ў Германію і квіткі (раней у нас была віза на год па запрашэнні)».

Іна кажа, што запісвалася праз сістэму анлайн-запісу.

«Пасля таго, як ты паспяхова ўнясеш усе неабходныя даныя, на пошту прыйдзе пацвярджэнне запісу. А далей чакаеш ліста з датай падачы. Тэрміны ўва ўсіх вар'іруюцца (здаецца, яны залежаць ад мэты паездкі) — ад года да двух гадоў. Пасля атрымання даты візіт неабходна пацвердзіць, перайшоўшы па спасылцы».

Яна таксама запісалася на падачу ў амбасаду Германіі ў кастрычніку 2024 — і каля месяца таму атрымала візу на 2 гады. Валерыя запісалася ў ліст чакання ў жніўні ўсё таго ж 2024 года, падавалася ў канцы студзеня. Вынік — далі візу на 30 дзён, хоць дзяўчына разлічвала на большае, бо ў яе было запрашэнне ад сяброў.

Карыстальніца Threads Маргарыта пасля двух гадоў чакання атрымала нямецкі шэнген на яшчэ меншы тэрмін — 9 дзён. А іншая карыстальніца Ірына — на 5 гадоў, у яе было запрашэнне ад сяброўкі, і гэта яе пятая нямецкая віза.

Іспанскі шэнген: «на 3 месяцы ў чысты пашпарт», але ў некага і адмова

Яўгеніі зрабілі сёлета іспанскі шэнген — на 3 месяцы ў чысты пашпарт: дакументы ёй падрыхтавалі ў агенцтве, на падачу запісалі за 1,5 тыдня — дзяўчына заплаціла за гэта 550 рублёў.

Арсеній падаваўся сам праз VIP-залу візавага цэнтра Іспаніі, бо там «месцаў заўсёды больш», і вынік той жа — у пашпарце віза на 3 месяцы з двухразовым уездам. Ён рэкамендуе ўступіць у групу ў тэлеграм і прытрымлівацца гайдаў — яны вельмі падрабязныя.

Соф'я таксама падавалася сама. Праз 5 тыдняў чакання атрымала візу на месяц (хоць спадзявалася на 3), іншых віз у дзяўчыны раней не было.

Вользе пашанцавала менш — яна спрабавала адкрыць іспанскую візу для сябе і пажылой маці праз памагатараў, але атрымала адмову. У агенцтве, з якім працавала дзяўчына, толькі рукамі развялі.

Італьянскі шэнген: «У чарзе на ганку толькі тыя, у каго ёсць нумар», але можна і з турам

Усе суразмоўцы, якія атрымалі італьянскі шэнген, — з той самай «сшыткавай» чаргі. Да студзеня 2025 года ў візавы цэнтр Італіі можна было запісацца па жывой чарзе — але затым рэгістрацыю такім шляхам прыпынілі і аднавілі толькі ў лістападзе.

А з 1 ліпеня запіс і прыём заявак будзе рабіць візавы цэнтр VF Worldwide на вуліцы Максіма Танка ў Мінску.

«Цяпер у чарзе на ганку толькі тыя, у каго ёсць нумар у журнале, — як правіла, ад 40+ тысяч», — расказвае Ангеліна.

Яна сама атрымала візу ў студзені, запісалася яшчэ восенню 2024 года — але потым планы змяніліся, і яна не спрабавала высвятляць, што з яе нумарам, вырашыла, што «прапаў». Аднак калі дзяўчына зноў загарэлася ідэяй зрабіць візу, знаёмыя параілі ёй падысці ў візавы цэнтр і паспрабаваць. Вынік — віза на 2 гады. Раней у Ангеліны была гадавая віза. Ёсць пацвярджэнне знаходжання ў Італіі.

Іван таксама атрымаў італьянскі шэнген — на 3 месяцы. Ён кажа, што вывучыў чаты ў тэлеграме і зразумеў: найлепшы варыянт — купіць аўтобусны тур. «Так, не вельмі камфортна, але затое візу робяць альбо бясплатна, альбо за сімвалічныя грошы». Таксама зрабіла і Вольга: яна палічыла, колькі ашчадзіць, калі будзе займацца арганізацыяй свайго падарожжа сама, і прыйшла да высновы, што прасцей купіць аўтобусны тур на тыдзень.

«Я заплаціла 700 еўра, плюс консульскі і сэрвісны збор — а ў Threads памагатары толькі за візу просяць 900 еўра».

Настасся ў 2024 годзе запісалася і ў «сшытак» у візавым цэнтры Італіі, і ў чаргу ў амбасадзе Германіі. У выніку італьянскі шэнген ёй далі ў канцы мінулага года — у чысты пашпарт, а цяпер яна чакае, што вось-вось будзе дата падачы на нямецкі.

Грэчаскі і венгерскі шэнген: каму вярнулі пашпарты без віз, а каму — далі візу на 3 гады

Наталля зрабіла грэчаскую візу сама — сабрала дакументы і запісалася праз сайт. На гэта, паводле слоў дзяўчыны, пайшоў адзін вечар, дата падачы была праз тыдзень. У выніку яна атрымала візу пад даты паездкі — на 14 дзён.

А вось карыстальніца Threads Марына скардзіцца, што ёй і сыну вярнулі пашпарты без віз — хоць яны падавалі дакументы пад аўтобусны тур у Грэцыю. Тлумачэнняў ніхто не даў. Рашэнне можна абскардзіць, але Марына не хоча, бо гэта робіцца на грэчаскай мове.

Вольга атрымала ўзімку венгерскі шэнген — пад тур. Ёй далі візу пад даты паездкі, але ў іх групе былі і людзі, якія атрымалі на большы тэрмін, «максімальна — на год». Дзяўчына кажа, што спачатку планавала падавацца сама, але не змагла злавіць слоты. А потым палічыла, што з турам і шанцаў на станоўчы вынік будзе больш.

А яшчэ адна Наталля, купіўшы тур у Венгрыю, у сакавіку атрымала візу на 3 гады.

Французскі шэнген: «Прыклалі стос выпісак і скрынаў, а ў выніку атрымалі візы на месяц»

Амбасада Францыі ў лютым змяніла працэдуру падачы заявак на атрыманне візы, перадала функцыі па запісе кампаніі TLScontact.

Кацярына падавалася ў канцы зімы. Дзяўчына купіла аўтобусны тур — і атрымала візы на 10 дзён. Аднак яна лічыць, што гэта дрэнны вынік, бо ў яе ў пашпарце ўжо была шэнгенская віза на 1,5 года, і яна разлічвала на большае.

«У агенцтве мне сказалі, што Францыя дае мінімум на паўгода, а тым, у каго ўжо былі візы, — на тры. А тут такое расчараванне».

Карыстальніца Threads Галіна таксама купіла тур у Францыю, «каб далі нармальную візу». У пашпарце ў яе ўжо ёсць паўгадавая віза ад французаў, атрыманая пад тур, і дзве іспанскія — па 3 месяцы. У выніку ў маі яна атрымала візу на 15 дзён.

Алег таксама незадаволены: падаючыся на візы ў французскую амбасаду (па запрашэнні ад сяброў), яны з жонкай прыклалі «цэлы стос выпісак і скрынаў», якія пацвярджаюць, што яны неаднаразова былі ў Парыжы. А ў выніку атрымалі візы на месяц.

«Нас з жонкай папярэджвалі: французы больш любяць чыстыя пашпарты, а італьянцы — з гісторыяй падарожжаў. Нашы сябры рабілі пад тур у Італію (бо нумаркоў з «жывой чаргі» ў іх не было) — і ім далі візы на год. Але мы палічылі, што ў французскай амбасадзе ацэняць нашую лаяльнасць. Дарма!

Затое запісаліся хутка — цягам аднаго вечара (дакладней, ночы), слот атрымалі на наступны дзень, ну і даты падачы давялося пачакаць крыху больш за два месяцы».

Ганна падавалася ў французскую амбасаду ў кастрычніку мінулага года (купіла тур) — атрымала візу на 6 месяцаў у чысты пашпарт. Цяпер хацела б паўтарыць гэты досвед, але, «начытаўшыся паведамленняў у чатах, пабойваецца», што так надоўга не дадуць.

Каментары да артыкула