«Пераклічка кожныя тры гадзіны». У «Новай Баравой» бацькі адстаялі вялізную чаргу ля сцен школы
У пятніцу, 12 чэрвеня, у школах і гімназіях пачаўся прыём дакументаў ад бацькоў будучых першакласнікаў. Для падачы заявак у школу №2 у в. Копішча (Новая Баравая) бацькі пачалі займаць чаргу за некалькі дзён, а пераклічку праводзілі кожныя тры гадзіны, піша Onliner.by.
— Яшчэ ў сераду вечарам пад школай №2 пачалі фармаваць спісы для падачы заяў на паступленне ў 1‑ы клас, — кажа Марынa, мама будучай першакласніцы (імя зменена). — Да гэтага на сходзе нам сказалі, што возьмуць у школу не ўсіх, а толькі 215 чалавек, у падоўжанку яшчэ менш — 200. Астатніх будуць накіроўваць у Бараўляны ці кудысьці яшчэ.
Як патлумачыла чытачка, у 1‑й школе такога ажыятажу не назіралася, бо за ёй замацавана не так шмат адрасоў сярод жыхароў мікрараёна. «Амаль уся «Новая Баравая» пайшла ў 2‑ю школу», — кажа мама.
Бацькі, якія хацелі быць упэўненымі, што дзіця пойдзе ў школу недалёка ад дома, пачалі ствараць спісы.
Як піcала «Мінская праўда», кожныя тры гадзіны каля школы збіраліся каля 150 чалавек. У апошні дзень дзяжурства павінна было быць кругласутачным. На адну з перапісак прыехаў начальнік галоўнага ўпраўлення адукацыі Мінскага аблвыканкама Мікалай Башко. Бацькам прапанавалі дзяжурыць ля сцен школы, але не поўным складам, а «арганізаванымі групамі».
«Да раніцы збярэцеся ўсе разам і будзеце расказваць іншым бацькам, што вы занялі чаргу і перад вамі больш за 100 чалавек», — прапанаваў Мікалай Башко.
А 8‑й раніцы 12 чэрвеня каля сцен школы ўжо стаяла вялізная чарга. Яна пачыналася на вуліцы, а камісія прымала дакументы не ў кабінетах, а ў спартыўнай зале. Дырэктарка школы заявіла, што сёлета адміністрацыя прыме 275 заявак, а падоўжанкай забяспечыць 230 дзяцей.
Пра тое, колькі ў выніку было прынята ахвочых на гэтыя месцы, у матэрыяле не паведамляецца.
«Прастаяла ў чарзе больш за сем гадзін»
Чытачка расказала, што ў яе не было магчымасці адзначацца ў спісах загадзя. Яна прыйшла да сцен школы а 9 раніцы 12 чэрвеня і была ўжо «22..-й» па ліку, то-бок павінна была прапусціць больш за 200 чалавек.
— Калі раніцай у чарзе я размаўляла з людзьмі, яны казалі, што некаторыя нават начавалі пад школай. Спачатку дамовіліся адзначацца кожную гадзіну, але потым вырашылі, што кожныя тры, — сцвярджае чытачка. Марынa падала дакументы сёння а 15:45, то бок прастаяла ў чарзе больш за сем гадзін. Кажа, што за ёй яшчэ былі людзі — «каля 15—20 чалавек».
— Ці ўсім удалося запісаць дзіця, хто хацеў?
— Пакуль незразумела, кажуць рознае. Асабіста нам пакуль нічога не сказалі, ніякіх прагнозаў і абяцанняў. Тут пытанне не толькі ў траплянні ў школу згодна з рэгістрацыяй, але і ў падоўжанцы. Застацца без яе мы не можам, бо абое працуем і ёсць яшчэ адно дзіця, якое ходзіць у садок. Калі не трапім у групу падоўжанага дня, то застаецца толькі звальняцца, каб забіраць дзіця са школы а 12. У падоўжанку я была 190‑я ў чарзе, але туды ёсць ільготныя катэгорыі, якія могуць прыйсці да канца жніўня…
На сайце школы апублікаваныя лічбы набору — 215 месцаў. Паводле звестак на вечар 12 чэрвеня, усяго было пададзена 281 заява, свабодных месцаў няма.