Сяргей Ціханоўскі перабраўся жыць у Лос-Анджэлес
Былы палітвязень Сяргей Ціханоўскі да першай гадавіны свайго вызвалення з калоніі ў Беларусі запісаў відэазварот, у якім сярод іншага падзяліўся апошнімі навінамі са свайго жыцця.
Сяргей Ціханоўскі. Скрыншот з відэа
«Сёння ў Лос-Анджэлесе я вывучаю англійскую мову, рыхтуюся да паступлення ва ўніверсітэт, пішу кнігу і займаюся творчасцю.
Я таксама ўдзячны ўсім, хто падтрымаў мяне пасля вызвалення.
Адаптацыя да жыцця на волі — гэта няпростае выпрабаванне. Кожны новы дзень нагадвае мне, наколькі каштоўныя сям'я, свабода і магчымасць гаварыць праўду», — напісаў Ціханоўскі, які раней, наколькі было вядома, жыў у Маямі.
У гэтым допісе ён падзякаваў усім амерыканскім чыноўнікам і дыпламатам, дзякуючы ўдзелу якіх Ціханоўскі і іншыя палітвязні апынуліся на волі — Джону Коўлу, Крыстаферу Сміту, Кіту Келагу і іншым.
«Асаблівая падзяка маёй жонцы Святлане. Увесь гэты час яна змагалася не толькі за мяне, але і за Беларусь, за права беларусаў жыць у свабоднай краіне. Я ведаю, праз што ёй давялося прайсці. Святлана, я люблю цябе і ганаруся табой», — адзначыў таксама былы палітвязень.
Напрыканцы допісу ён звярнуўся да сучаснай палітычнай сітуацыі:
«Палітыка дыктатара прывяла да таго, што Беларусь у гэтыя дні зноў балансуе на мяжы вайны. Я малюся за тое, каб гэтага не адбылося».
Чытайце таксама:
Ціханоўская: Дзеці хутка вернуцца да мяне ў Варшаву. Вельмі чакаю