Як у Амерыцы. У Бабруйску гандлёвы цэнтр адчынялі з помпай, пераразаннем чырвонай стужкі і штурмам дзвярэй
Гандлёвы цэнтр «Этажэрка» адкрыўся 25 чэрвеня.
Урачыстая цырымонія з пераразаннем чырвонай стужкі сабрала вялікую колькасць людзей, піша bobr.by.
Цікаўныя пачалі падыходзіць да новага гандлёвага цэнтра яшчэ за паўтары гадзіны да адкрыцця. Было нямала дзяцей і падлеткаў.
У адкрыцці ўзялі ўдзел старшыня Бабруйскага гарвыканкама Максім Гурын, заснавальнік «Будпраект-Р» Ігар Турлыка і дырэктарка ТАА «Гандлёвы дом Простор» Наталля Анатольеўна Несцяровіч.
Ганаровыя госці першымі ўвайшлі пад скляпенні новага гандлёвага цэнтра. Затым у гандлёвыя залы пачалі заходзіць людзі, якія ўжо паспелі стаміцца ад гарачага чэрвеньскага сонца.
Эмацыйнасць і ажыятаж дзяцей і падлеткаў у натоўпе выклікалі пэўныя асцярогі. І праз паўгадзіны пасля адкрыцця шчыльны паток ахвотных зазірнуць унутр «Этажэркі» не змяншаўся.