Беларусь згадалі ў папулярным шпіёнскім серыяле — ізноў
21 чэрвеня на стрымінгавым сэрвісе Paramount+ (а таксама на SkyShowtime) выйшаў другі сезон амерыканскага шпіёнскага серыяла «Агенцтва» (The Agency), спрадзюсаванага Джорджам Клуні. У першым сезоне фігуравала Беларусь — і ў працягу назва нашай краіны ўсплывае зноў ужо ў першым эпізодзе, піша «Люстэрка» са спасылкай на Decider і El Periódico.
Рычард Гір, Джэфры Райт, Майкл Фасбендэр у серыяле «Агенцтва». Фота: IMDb
«Агенцтва» — амерыканскі рэмейк французскага хіта «Бюро легенд» (Le Bureau des Légendes). Серыял стварылі браты Джэз і Джон-Генры Батэрварт, якія, сярод іншага, былі сцэнарыстамі некалькіх фільмаў франшыз «Джэймс Бонд» і «Індыяна Джонс». Прадзюсар «Агенцтва» — Джордж Клуні. Асноўныя ролі выконваюць Майкл Фасбендэр (франшыза «Людзі Ікс», «12 гадоў рабства», «300 спартанцаў», «Безслаўныя выблюдкі», «Чужы: Запавет»), уладальнік «Оскара» Джэфры Райт («Свет Дзікага Захаду», некалькі апошніх фільмаў пра Джэймса Бонда, другая і трэцяя часткі «Галодных гульняў», «Адны з нас», «Бэтмен»), кіналегенда Рычард Гір.
У цэнтры сюжэта — афіцэр ЦРУ Брэндан Колбі па мянушцы Марсіянін. Правёўшы некалькі гадоў пад прыкрыццём у Афрыцы, ён вымушаны вярнуцца ў лонданскую рэзідэнтуру. Там усплывае жанчына з яго мінулага, і асабістае жыццё непазбежна пераплятаецца з працай. Адначасова ў ведамстве ідуць пошукі «крата».
Беларусь узгадалі ў серыяле з самага пачатку. Адзін з персанажаў — агент ЦРУ Пётр Рыбак з пазыўным Каёт (яго грае Алекс Рэзнік, украінскі акцёр, які нарадзіўся ў Адэсе і жыве ў ЗША) — працаваў у нашай краіне пад глыбокім прыкрыццём. Фінал сезона шмат у чым быў прысвечаны аперацыі ЦРУ па яго выратаванні.
Як пішуць выданні El Periódico і Decider, другі сезон адкрываецца менавіта з гэтага моманту: Каёт ужо вывезены з Беларусі, і Марсіянін з калегам дапытваюць яго — у прыватнасці, высвятляючы, ці не скарыстаўся той становішчам для нажывы.
У першым сезоне, дарэчы, была і іншая сюжэтная лінія, звязаная з нашым рэгіёнам: агент пад прыкрыццём дзейнічаў на акупаваных тэрыторыях Украіны, а дапамагалі яму ўкраінскія вайскоўцы, якіх сыгралі ўкраінскія ж акцёры — Аляксандр Рудзінскі і Сяргей Анопка.
У новым сезоне паралельна развіваецца некалькі ліній. Марсіянін, як піша Decider, працягвае шукаць спосаб выратаваць сваю каханую, рызыкуючы пры гэтым праваліць усю місію. Іншы агент, Даніэла па мянушцы Грэмлін, дзейнічае ў Тэгеране пад прыкрыццём студэнткі і спрабуе выйсці на ядзерную праграму Ірана. А паляванне на «крата» ў лонданскай рэзідэнтуры працягваецца.
Першы сезон сабраў больш за пяць мільёнаў гледачоў на ўсіх платформах у першыя ж выхадныя, і Paramount+ яшчэ ў снежні 2024 года абвясціў пра працяг. Другі сезон быў выкладзены 21 чэрвеня цалкам, адразу ўсе дзесяць серый, і ў першыя дні пасля выхаду ўзначаліў чарты Paramount+ у Германіі і Італіі. Паводле даных Rotten Tomatoes, крытыкі ацанілі яго вышэй за першы: 90% адабрэння супраць 66% у дэбютнага сезона. Глядацкі рэйтынг на тым жа сайце за першы сезон склаў 78%, агульны рэйтынг серыяла на IMDb — 7,4 з 10.
Беларусь у апошнія гады рэгулярна з’яўляецца ў заходнім кіно і на тэлебачанні — напрыклад, у серыялах «Зваротны адлік» (The Countdown), «Ранішняе шоу» (The Morning Show), фільме «Кіраўнікі дзяржаў» (Heads of State).