Сіноптык спрагназаваў, калі ў Беларусі спадзе спякота
Беларусь чакае некалькі дзён трапічнай спёкі, якая, паводле прагнозу сіноптыка Дзмітрыя Рабава, захаваецца да сярэдзіны наступнага тыдня.
Здымак ілюстрацыйны. Фота: «Наша Ніва»
У асобных раёнах краіны тэмпература паветра можа дасягаць +38 градусаў, а ночы будуць душнымі і трапічнымі.
Па словах Рабава, з 1 ліпеня ў Беларусь паступова пачне паступаць больш прахалоднае паветра. Разам з ім чакаюцца дажджы, навальніцы і парывісты вецер.
У сераду ўдзень прагназуецца ад +25 да +30 градусаў, а на поўдні і паўднёвым захадзе краіны спякота яшчэ захаваецца — да +35. У чацвер ападкі і навальніцы ахопяць большасць рэгіёнаў. Ноччу тэмпература складзе +13…+18, удзень — ад +21 да +30 градусаў.