У дні анамальнай спёкі больш за 100 беларусаў атрымалі цеплавыя траўмы
Паводле звестак Міністэрства аховы здароўя, з 22 чэрвеня было зафіксавана 111 такіх выпадкаў. Амаль палова пацярпелых — 48 чалавек — былі шпіталізаваныя, астатнім дапамогу аказалі амбулаторна.
Здымак ілюстрацыйны. Фота: «Наша Ніва»
За апошнія суткі таксама адзначаны новы рост зваротаў: 43 чалавекі звярнуліся да дактароў, у тым ліку 15 у Брэсцкай вобласці.
Медыкі тлумачаць, што цеплавыя траўмы ўключаюць цеплавы ўдар, сонечны ўдар і цеплавыя сутаргі. Усе гэтыя станы ўзнікаюць праз перагрэў арганізма і страту вадкасці і соляў.
Спецыялісты папярэджваюць, што ў спёку арганізм хутка траціць ваду, кроў згушчаецца, што павышае рызыку тромбаў. Асабліва небяспечна гэта для людзей з сардэчна-сасудзістымі захворваннямі, бо ўзрастае верагоднасць інсультаў і інфарктаў.
Медыкі рэкамендуюць у гарачае надвор’е піць дастатковую колькасць вады, насіць лёгкае адзенне светлых колераў, пазбягаць прамых сонечных прамянёў, а таксама абмежаваць фізічныя нагрузкі і ўжыванне алкаголю.
Раней паведамлялася, што 29 чэрвеня ў Беларусі быў зафіксаваны рэкорд тэмпературы за ўсю гісторыю назіранняў — у Пінску паветра прагрэлася да +40,4°C.
Чытайце таксама:
Як выжыць у анамальную спёку. Нечаканыя, але дзейсныя парады навукоўцаў
Ад анамальнай спёкі ў Еўропе за тыдзень загінулі больш за 1300 чалавек