Беларус за 1000 еўра купіў у Расіі пасведчанне кіроўцы. Цяпер у яго праблемы ў Польшчы
У Варшаве дарожная паліцыя спыніла для праверкі грамадзяніна Беларусі, але яго пасведчанне кіроўцы падалося патрульным падазроным. Высветлілася, мужчына купіў яго некалькі гадоў таму ў Расіі. Цяпер ён можа атрымаць рэальны тэрмін у Польшчы, вынікае з паведамлення дарожнай паліцыі, піша выданне Most.
Фота: ksp.policja.gov.pl
Аўтамабіль Toyota, за рулём якога быў беларус, спынілі падчас аперацыі «Бяспечныя перавозкі 2026» на вул. Aleje Jerozolimskie. Кіроўца паказаў пасведчанне, але ўжо пры яго першасным аглядзе ў супрацоўнікаў узніклі падазрэнні.
«Падрабязны аналіз з выкарыстаннем павелічальнага шкла, абсталяванага ультрафіялетавай падсветкай, паказаў адсутнасць характэрных ахоўных элементаў і прыкметы таго, што дакумент быў выраблены метадам струмянёвага друку», — паведамілі ў паліцыі.
Тады кіроўца прызнаўся, што набыў дакумент некалькі гадоў таму ў Расіі за 1000 еўра.
Мужчыну затрымалі, пасведчанне кіроўцы канфіскавалі, а машыну эвакуявалі.
За выкарыстанне падробленага або змененага дакумента як сапраўднага ў Польшчы пагражае пазбаўленне волі на тэрмін ад 3 месяцаў да 5 гадоў.
Чытайце таксама:
Пенсіянер з Гомеля паверыў махлярам, прадаў кватэру, набраў пазык і аддаў грошы
«Вам канец». Як мінчук чатыры дні вадзіў за нос махляроў і чым скончылася
«Лена 20 рублёў» узялася за старое: знакамітая махлярка зноў разводзіць даверлівых беларусаў