Аргенціна і Месі выйшлі ў паўфінал чэмпіянату свету
У Ліянэля — асіст. Паўфінал з Англіяй.
Фота: Ed Zurga / AP
Зборная Аргенціны выйшла ў паўфінал чэмпіянату свету, у дадатковы час вырваўшы перамогу ў Швейцарыі — 3:1
Зборная адкрыла лік на 10‑й хвіліне — забіў МакАлістар з пасу Месі, на 67‑й Ндае зраўняў, але на 72‑й Эмбало быў выдалены з поля за другую жоўтую, і Швейцарыя засталася ўдзесяцёх. І потым мужна адбівалася да канца асноўнага часу.
Характэрны момант адбыўся на 82‑й хвіліне пры ліку 1:1.
Месі ў нейкай атацы збілі з ног, парушэння не было, аргенцінец паляжаў секунд пяць на газоне і хутка ўзняўся ды пабег далей шукаць шляхі да варот Швейцарыі. А праз дзве хвіліны выйшаў адзін на адзін з галкіперам швейцарцаў Кобелем, але бакавы суддзя ўзняў сцяжок: афсайд.
Асноўны час скончыўся 1:1.
У дадатковы час на 112‑й хвіліне Хуліян Альварэс забіў гол, а ў самым канцы дадатковага часу кропку паставіў Лаўтара Марцінес — 3:1.
Такім чынам паўфіналы:
Францыя — Іспанія (аўторак, 22:00)
Англія — Аргенціна (серада, 22:00).
Фінал у наступную нядзелю, 19 ліпеня.
Аргенціна выйграла мінулы чэмпіянат свету, але з 1962 года ніводная зборная двойчы запар не выйгравала мундыяль. У 1958 і 1962 года ЧС запар выйгравала Бразілія, і ўсё, як адрэзала, толькі з перапынкам паміж мундыялямі.
Напрыклад, Аргенціна выйграла ЧС-1986, у фінале 1990 года прайграла ФРГ, Бразілія перамагла на мундыялі ў 1994 годзе, у фінале 1998 года прайграла Францыі. Францыя выйграла ЧС у 2018 годзе, а ў 2022 годзе ў фінале па пенальці саступіла Аргенціне.
Прычым мінуламу пераможцу яшчэ трэба выйсці ў фінал, некаторыя нават у плэй-оф не выходзяць. Як Германія ў 2018 годзе.