У ДРК у выніку ўспышкі ліхаманкі Эбола памерлі больш за тысячу чалавек

У Дэмакратычнай Рэспубліцы Конга колькасць ахвяр успышкі ліхаманкі Эбола перавысіла тысячу чалавек. Пра гэта паведаміў генеральны дырэктар Афрыканскага цэнтра па кантролі і прафілактыцы захворванняў, піша Euronews.

Фота: AP Photo / Moses Sawasawa

Паводле апошніх звестак Міністэрства аховы здароўя Дэмакратычнай Рэспублікі Конга, па стане на панядзелак у краіне было зарэгістравана 2473 выпадкі захворвання. Прынамсі 737 пацыентаў знаходзяцца ў ізаляцыі або праходзяць лячэнне ў медыцынскіх установах.

Кіраўнік Афрыканскага цэнтра па кантролі і прафілактыцы захворванняў Жан Касея паведаміў, што колькасць памерлых дасягнула 1031 чалавека. Паводле яго слоў, людзі працягваюць паміраць з-за недахопу вакцын, лекаў і фінансавання для барацьбы з эпідэміяй.

Сусветная арганізацыя аховы здароўя ацэньвае цяперашнюю ўспышку як трэцюю па маштабах за ўсю гісторыю назіранняў за ліхаманкай Эбола ў Дэмакратычнай Рэспубліцы Конга.

Эпідэмія пачалася 15 мая на ўсходзе Дэмакратычнай Рэспублікі Конга і ва Угандзе. Асноўным асяродкам распаўсюджвання інфекцыі стала кангалезская правінцыя Ітуры.

На мінулым тыдні Оксфардскі ўніверсітэт распачаў першыя ў свеце клінічныя выпрабаванні вакцыны супраць віруса Бундыбуджыа — аднаго з відаў эболавіруса, які стаў прычынай цяперашняй успышкі смяротна небяспечнай хваробы.

Каментары да артыкула