У Мінск едзе сусветна вядомая Kapela ze Wsi Warszawa
Разам з польскімі музыкамі на сцэну КЗ "Мінск" выйдзе этна-трыа "Троіца".
Экспансія польскай музычнай культуры ў Мінску, арганізаваная беларускай ПАНстудыяй, працягваецца. З дапамогай Польскага Інстытута ў Мінску і фонду імя Адама Міцкевіча "панам" удалося “завабіць” у беларускую сталіцу сусветна вядомы польскі этна-гурт Kapela ze Wsi Warszawa.
“Па-ранейшаму нас бянтэжыць той дзіўны факт, што пра культуру англасаксонскую, культуру расійскую і амерыканскую мы ведаем болей, чым пра культуру, якая пачынаецца праз 350 кіламетраў ад нашай сталіцы, - тлумачыць ідэю экспансіі галоўны Пан “студыі” Зміцер Саладуха. - І нам вельмі прыкра, што тая вялікая польская культура, якая ўплывала на фармаванне і развіццё беларускай культуры, нам амаль не знаёмая”.
Беларускім адказам Kapela ze Wsi Warszawa стане выступ этна-трыа “Троіца”. Абодва гурты сыграюць на сцэне КЗ “Мінск” 3 чэрвеня.