Паліклініка адмовіла незалежнай газеце ў інтэрв'ю, бо… «план па публікацыях ужо выканала»

У планы баранавіцкай дзіцячай паліклінікі не ўпісалася Intex-press.

Баранавіцкай газеце Intex-pressадмовілі ў інтэрв’ю па прафілактыцы зніжэння зроку ў школьнікаў, паколькі дзіцячая паліклініка… «план па публікацыях ужо выканала».

Карэспандэнт выдання Наталля Саламянка звярнулася да загадчыцы медычнай установы Людмілы Ляшчыны з прапановай зняць відэасюжэт на тэму папярэджання зніжэння зроку ў дзяцей дашкольнага і школьнага ўзросту. Аднак дазволу на здымку лекар не дала.

«На мінулым тыдні мы ўжо выступілі па тэлебачанні, запісалі інтэрв’ю на радыё, далі артыкул у раённую газету, таму ваша выданне ўжо ніяк не ўпісваецца ў нашы планы, выбачайце», — такім быў адказ загадчыцы.

На пытанне карэспандэнта, што рабіць тым гараджанам, якія ў якасці крыніцы інфармацыі выбіраюць Intex-press і не глядзяць мясцовы тэлеканал, не чытаюць раённую газету, не слухаюць радыё, загадчыца адказала, што хоць і паважае нашых чытачоў, але ні яна, ні хто-небудзь іншы з дзіцячых лекараў даваць інтэрв’ю ўсё адно не стане.

Зразумела, што зрок у дзяцей тых бацькоў, якія чытаюць Intex-press, не пагоршыцца рэзка з-за таго, што выданне не змагло асвятліць гэту тэму. Але пытанне, для чаго наогул праводзіцца ўся прафілактычная праца — для «галачкі» ў плане выступаў ці для таго, каб як мага болей людзей даведалася, як захаваць здароўе дзяцей — здаецца рытарычным.

Каментары да артыкула