Technahiennaja katastrofa va Ŭkrainie. Ci pryjdzie vobłaka z praduktami hareńnia ŭ Biełaruś?
U MNS Biełarusi zajaŭlajuć, što paničnyja čutki biespadstaŭnyja.
Žoŭty fosfar, adna z madyfikacyj zvyčajnaha fosfaru, što vykarystoŭvajecca ŭ vytvorčaści zapałak, źjaŭlajecca vielmi atrutnym rečyvam i navat u minimalnych dozach pry traplańni ŭ arhanizm śmiarotny dla čałavieka. Naprykład, jak zanačajuć specyjalisty, praz taksičnaść rečyva chutka pačynajuć vypadać zuby.
U Lvoŭskaj vobłaści na miescy zdareńnia praciahvajuć pracavać chimičnyja vojski MNS. Z terytoryj, što raźmieščany la miesca katastrofy (heta Buski rajon na paŭnočnym uschodzie vobłaści), pravodzicca evakuacyja nasielnictva. Evakuavanyja kala 800 čałaviek: u zonu zabrudžańnia trapili ź dziasiatak nasielenych punktaŭ.
MNS Ukrainy zajaŭlaje, što chod likvidacyi nastupstvaŭ avaryi znachodzicca pad kantrolem dziaržaŭnaj kamisii i ratavalnikaŭ, i pahrozy dla žyćcia žycharoŭ rehijonu niama. Ale žychary viosak, što apynulisia ŭ epicentry avaryi skardziacca na brak infarmacyi i praciahvajuć pakidać svaje damy, pieradaje ukrainskaja słužba BBC.
Ludzi, što paciarpieli, skardziacca na słabaść. Dyjahnaz -- atručvańnie parami žoztaha fosfaru. Usie paciarpiełyja adpraŭlenyja mašynami chutkaj dapamohi da vajskova-medycynskaha centru ŭ Lvovie.
Padčas hareńnia vadkaści ŭtvaryłasia chmara z praduktaŭ hareńnia (zona zabrudžvańnia składaje 90 kv km). U aŭtorak chmara dasiahnuła Vałynskaj vobłaści i ciapier, mahčyma, ruchajecca ŭ bok Biełarusi — siońnia ŭnačy viecier źmianiŭsia na paŭdniovy. Praŭda, u druhoj pałovie dnia jon musić źmianicca na zachodni.
Jak pieradaje naš karespandent ź Bieraściejskaj vobłaści, siarod nasielnictva rehijonu pačali raspaŭsiudžvacca paničnyja čutki nakont nastupstvaŭ avaryi.
Ale Ministerstva pa nadzvyčajnych sytuacyjach zaznačaje, što čutki biespadstaŭnyja. «Pakul pahrozy dla Biełarusi nie isnuje», — cytuje BiełaPAN kamentar presa‑sakratara Ministerstva pa nadzvyčajnych sytuacyjach Biełarusi Vitala Navickaha.
«My znachodzimsia ŭ ciesnym kantakcie z MNS Ukrainy. Pakul jany rasceńvajuć hetuju nadzvyčajnuju sytuacyju jak rehijanalnuju. Kali isnuje niejkaja mahčymaść prasoŭvańnia atrutnych apadkaŭ na našu terytoryju, ukrainskija kalehi pavinny źmianić status nadzvyčajnaha zdareńnia i ŭ abaviazkovym paradku nas prainfarmavać. Na 7.30 siońniašniaha dnia takoj infarmacyi my nie atrymlivali».
Tym časam pačaŭsia manitorynh pavietra ŭ sumiežnych z Ukrainaj rajonach. Taksama źmianiŭsia maršrut ciahnika Miensk — Ivana‑Frankoŭsk, kab abyści zabrudžany rehijon.