Juryj Zisier prynios prabačeńni za Čudziancova, ale zvalniać nie budzie

Pra heta staršynia ahulnaha schodu ŭdzielnikaŭ TAA «TUT BAJ Miedyja» napisaŭ u svaim akaŭncie ŭ fejsbuku.

Uładzimir Čudziancoŭ vydaliŭ svoj akaŭnt u Fejsbuku i vycier usie zapisy z Łajvdžornała paśla taho, jak u internecie prakaciłasia chvala krytyki. Jak vyśvietliłasia, Čudziancoŭ pačynaŭ svaju karjeru žurnalista z paklopnickich materyjałaŭ na lidaraŭ apazicyi ŭ 1990-ch. Tady jon byŭ Uładzimiram Zujevym. Juryj Zisier, ułaśnik Tut.baja, piša:

«Spadarstva, ja taksama nie zaŭsiody zhodny z tym, što piša sp. Čudziancoŭ. Mnohija jaho vykazvańni ja nie padzialaju. Kali pamiatajecie, u svajoj «prezumpcyi vinavataści bahatych» (z nahody Porsche Cayenne) ja navat vykazvaŭ svaju niazhodu publična.

Prynošu svaje vybačeńni ad imia partała za ŭsie źniavahi, jakija nanios Uładzimir u pieryjad svajoj pracy na partale.

Ale zvalniać jaho «za bijahrafiju» my ličym jak minimum niepravamiernym. Słužbovych prastupkaŭ, za jakija pradpryjemstva maje prava zvolnić rabotnika, jon nie ździajśniaŭ.

Siońnia Uładzimir pakajaŭsia pierad top-menedžarami Tut.by i atrymaŭ apošniaje kitajskaje papiaredžańnie. Dasiahnuta damoŭlenaść, što pry paŭtory padobnych epizodaŭ jon napiša zajavu ab sychodzie.

(…)

Pohlady ludziej majuć tendencyju evalucyjanavać. I kali niechta skaža, što jaho pohlady i adnosiny da padziejaŭ za 20, abo 10, ci navat hadoŭ zusim nie źmianilisia — ja ŭ heta nikoli nie pavieru.

Tamu ja adkidaju ŭsiakuju adkaznaść Tut.by za dziejańni Čudziancova 15-20-hadovaj daŭniny.

P. S. Adnačasna chaču zaŭvažyć, što my nie źbirajemsia zabaraniać kamu-niebudź (u tym liku Chartyi) pieradrukoŭvać materyjały Tut.by».

Kamientary da artykuła