Avijadebašyr Siarhiej Kabałaŭ budzie ekstradziravany ŭ Rasiju
Takoje rašeńnie pryniała Hienprakuratura Biełarusi.
Jak paviedamili BiełaPAN u Hienprakuratury, padčas ekstradycyjnaj pravierki pieraškod da jaho vydačay nie ŭstanoŭlena. U vyniku 17 krasavika Hienieralnaj prakuraturaj Biełarusi była vyniesiena pastanova ab vydačy Kabałava kampietentnym orhanam RF dla pryciahnieńnia da kryminalnaj adkaznaści. U suviazi z tym, što heta pastanova Kabałavym nie abskardžana i nabyła zakonnuju moc, jon budzie pieradadzieny rasijskamu boku.
Kabałaŭ abvinavačvajecca va ŭčynieńni złačynstvaŭ, praduhledžanych č. 3 art. 30, p. «v» č. 2 art. 211 (zamach na zachop pavietranaha sudna ŭ metach uhonu, učynieny z prymianieńniem nasilla, niebiaśpiečnaha dla žyćcia i zdaroŭja, i z pahrozaj prymianieńnia takoha nasilla), p. «a» č. 2 art. 115 (naŭmysnaje naniasieńnie lohkaha ŭronu zdaroŭju, što vyklikała karotkačasovaje rasstrojstva zdaroŭja, učynienaje z chulihanskich pabudžeńniaŭ) Kryminalnaha kodeksa RF.
Nahadajem, Kabałaŭ, jaki arhanizavaŭ 12 studzienia hetaha hoda deboš na borcie samalota rejsa Maskva — Churhada, byŭ zatrymany 7 sakavika na padjeździe da Hrodna ŭ rajonie pasiołka Bierahavy supracoŭnikami kryminalnaha vyšuku i inśpiektarami DAI. U Hrodna jon nakiroŭvaŭsia na rynak «Paŭdniovy», kab nabyć rečy, jakija zatym mieŭ namier pierapradać u Rasii. Miarkujučy pa słovach zatrymanaha, u jaho najbližejšyja płany ŭvachodziła zdacca ŭładam, a zaroblenymi hrašami jon płanavaŭ zabiaśpiečyć svajakoŭ na pieryjad svajoj adsutnaści.
Svoj učynak na borcie samalota Kabałaŭ tłumačyć niervovym zryvam i prynosić prabačeńni paciarpiełym razam ź im pasažyram za zryŭ adpačynku.
Pavodle infarmacyi rasijskich ŚMI, na borcie łajniera Kabałaŭ pahražaŭ pasažyram fizičnaj raspravaj, nanios cialesnyja paškodžańni adnamu z pasažyraŭ, uryvaŭsia ŭ kabinu piłotaŭ, chacieŭ, kab samalot pasadzili na vadu. Debašyr taksama zapeŭnivaŭ, što jon sa śpiecnaza HRU, a taksama, što jon deputat.
Kabałaŭ lehalna pryjechaŭ u Biełaruś z Ukrainy 3 lutaha, aryjenciroŭka na jaho na miažu pastupiła tolki 5 sakavika.
Pavodle papiarednich źviestak MUS Biełarusi, jakich-niebudź supraćpraŭnych dziejańniaŭ na terytoryi Biełarusi Siarhiej Kabałaŭ nie ŭčyniŭ. Padčas zatrymańnia jechaŭ u aŭtamabili jak pasažyr. Pry praviercy dakumientaŭ pradjaviŭ rasijski pašpart.
Na dopycie Kabałaŭ pryznaŭsia, što pradprymaŭ miery pa niedapuščeńni svajho vyjaŭleńnia pravaachoŭnymi orhanami, u pryvatnaści ŭklučaŭ telefon tolki na niadoŭhi čas, vykarystoŭvaŭ sim-karty roznych apierataraŭ.