Łukašenka zahadaŭ pakarać daktaroŭ «Ekamiedsiervisa», a centr pieradać Minzdaroŭja
U suviazi z trahičnym vypadkam z pacyjentkaj miedycynskaha centra «Ekamiedservis» Alaksandr Łukašenka daručyŭ vyzvalić ad zajmanych pasadaŭ usich vinavatych miedrabotnikaŭ i administracyjny piersanał centra, a taksama ŭžyć da ich miery strymańnia ŭ adpaviednaści z zakanadaŭstvam.
Łukašenka daručyŭ taksama Ministerstvu achovy zdaroŭja ŭziać pad kantrol i kiravańnie miedycynskim centram «Ekamiedservis».
Budučynia hetaj kamiercyjnaj arhanizacyi budzie vyznačana ŭ bližejšy čas.
Kamitetu dziaržkantrolu daručana pravieryć finansava-haspadarčuju dziejnaść centra, a Śledčamu kamitetu zabiaśpiečyć pryniaćcie samych žorstkich mier pakarańnia da vinavatych, paviedamlaje BiełTA.
Jak paviedamlałasia raniej, u kancy sakavika ŭ miedycynskim centry była zroblena apieracyja pa rynapłastycy 23-hadovaj žycharcy Hrodna Julii Kubaravaj.
Paśla apieracyi pacyjentka ŭpała ŭ komu i nie vychodziła z hetaha stanu prykładna miesiac. Tak i nie pryjšoŭšy ŭ prytomnaść, Julija pamierła 23 krasavika ŭ 4-j kliničnaj balnicy Minska. Pravaachoŭnyja orhany pravodziać pravierku pa fakcie śmierci.
***
«Ekamiedservis» — adna z samych prestyžnych pryvatnych klinik u Minsku. Jana mieścicca na vulicy Tałstoha, kala vakzała. Śpiecyjalizujecca na pasłuhach płastyčnaj chirurhii, stamatałohii, dyjahnostyki. U internecie śćviardžałasia, što ŭdzieł u hetym biznesie maje Uładzimir Piefcijeŭ, były ŭłaśnik «Biełtecheksparta» i čałaviek, jaki trapiŭ pad sankcyi Jeŭrasajuza jak mahčymy finansist Alaksandra Łukašenki.
* * *
STAA “Ekamiedservis” adkryŭsia ŭ 1997 hodzie, ale tady jon nazyvaŭsia troški pa-inšamu: TAA “Ekamiedservis-Inviest”. Zajaŭlajecca, što ŭ pradpryjemstvie ŭdzielničaje amierykanski kapitał, adnak dakładny inviestar z ZŠA nieviadomy.
U 2005 hodzie Ministerstva achovy zdaroŭja pazbaviła “Ekamiedservis” razam z “Nardzinam” licenzii na miedycynskuju dziejnaść praz hrubyja parušeńni. Chadzili čutki, što dziaržava zrabiła taki zachad, kab atrymać častku akcyj miedcentra, adnak kiraŭnictva “Ekamiedservisa” abvierhła hetuju infarmacyju.
U 2005 hodzie “Ekamiedservis” pabudavaŭ piacipaviarchovy centr na vulicy Taŭstoha ahulnaju płoščaj u 5 000 kv. m.