Maładyja apazycyjanery parvali partret Pucina
I paabiacali masavyja studenckija vystupy pry kancy vosieni.
Jaŭhien Afnahiel |
Michaił Paškievič |
Illa Bohdan |
Mikita Sasim |
Pieršym pačaŭ vystupać adzin ź siabroŭ arhkamitetu pa praviadzieńni «Eŭrapiejskaha maršu» Jaŭhien Afnahiel. Jon zajaviŭ:
«Vy viedajecie, što ŭčora pasoł Rasiejskaj Federacyi ŭ Biełarusi Alaksandar Surykaŭ dazvoliŭ sabie niekarektnyja zajavy adnosna taho, što ŭ Biełarusi raźmieściacca rasiejskija vajskovyja bazy, a taksama što na terytoryju našaj krainy znoŭ budzie ŭviedzienaja jadziernaja zbroja. Heta robicca ŭ toj čas, kali Stanisłava Šuškieviča vyłučajuć na Nobeleŭskuju premiju miru akurat za toje, što jon vyvieŭ ź Biełarusi stratehičnuju jadziernuju zbroju. U suviazi z hetym my vyrašyli krychu źmianić lozunhi, pad jakimi projdzie akcyja 14 kastryčnika. Marš projdzie pad lozunhami: «Nie — rasiejskim vajskovym bazam, nie — jadziernaj zbroi!» Nakolki my razumiejem heta pazycyja nia tolki spadara pasła, ale j rasiejskaha ŭradu i asabista prezydenta Pucina».
Akurat paśla hetych samych słovaŭ usie piaciora ŭdzielnikaŭ pres‑kanferencyi ŭziali ŭ ruki partrety Ŭładzimiera Pucina i publična parvali ich.
Pradstaŭnik niezarehistravanych «Maładych demakrataŭ» Michaił Paškievič zaklikaŭ biełaruskuju dyjasparu pravodzić svaje akcyi pratestu nia tolki kala budynkaŭ biełaruskich pasolstvaŭ, ale i na centralnych praspektach vialikich haradoŭ zamiežža, kab ad hetaha byŭ bolšy efekt i hramadzki rozhałas.
Źmicier Chviedaruk pieraściaroh rektaraŭ universytetaŭ i supracoŭnikaŭ pravaachoŭnych orhanaŭ, kab tyja nie pieraškadžali moładzi ŭdzielničać u «Eŭrapiejskim maršy», bo ŭ advarotnym vypadku jany ryzykujuć trapić u novy śpis nieŭjaznych na terytoryju Eŭrasajuzu i ZŠA.
Mikita Sasim adznačyŭ, što va ŭsie časy moładź była ŭ avanhardzie zmahańnia za svabodu i demakratyju. Toje samaje ciapier adbyvajecca i ŭ Biełarusi.
«My zaklikajem usiu moładź dałučycca da akcyi, u tym liku i siabroŭ BRSM. Heta vosień budzie haračaj, bo adrazu paśla «Eŭrapiejskaha maršu» projdzie «Sacyjalny marš». Nia vyklučana, što ŭ samym kancy vosieni pačnucca masavyja studenckija vystupy».
Fota Julii Daraškievič