Ź vieraśnia daražejuć chleb, małako, harełka, prajezd u transparcie
Ministerstva ekanomiki choča kampensavać dyspraporcyju zakupačnych cenaŭ na materyjalna‑techničnyja resursy i sielhaspradukcyju.
Ad studzienia da lipienia rost vałavoha ŭnutranaha praduktu skłaŭ 8,8 %. Hrašovy prybytak nasielnictva ŭ naminalnym naličeńni vyras na 18 % (siaredni zarobak uźniaŭsia da $330), u realnym — 10,1 %. I inflacyja skłała ŭsiaho 4,1 %.
Karaciej, nie žyviom, a kvitniejem. Kab biełarusam nie razdureć ad takoj raskošy, urad vyrašyŭ pry kancy žniŭnia, pakul daloka da vosieńskich maršaŭ pratestu, uźniać ceny na pradukty pieršaj nieabchodnaści.
Pra heta abjaviŭ na pres-kanferencyi ŭ aŭtorak namieśnik ministra ekanomiki Ŭładzimier Adaškievič.
Małako i małočnyja pradukty padaražejuć na 4 %. Adbudziecca heta ŭ dva etapy: na 2 % u žniŭni i na hetulki ž ciaham vieraśnia. Heta vyklikana rostam zakupačnych cenaŭ na małako na 5 %.
Chleb i chlebapradukty taksama buduć daražeć paetapna, ahulny pamier rostu cenaŭ składzie 2,5—3 %. Pa słovach namieśnika ministra, tut usio zaležyć ad taho, pa jakoj canie daviadziecca zakuplać pšanicu. Na hetyja mety daviadziecca vydatkavać kala $20 młn. — kraina maje zakupić na bułki j makaronu da 200 tys. t. pšanicy, zakupačnyja ceny na jakuju siońnia składajuć kala $200 za tonu.
Ad 28 vieraśnia padaražeła harełka. Rost cany na hety pradukt skłaŭ 3 %. Sp. Adaškievič nia staŭ chavać, što hetaja halina charčovaj pramysłovaści «charaktaryzujecca vysokaj rentabelnaściu vytvorčaści», što siahaje 32 %.
Uładzimier Adaškievič adznačyŭ, što bieź dziaržaŭnaj padtrymki sielhaspradpryjemstvam nie abyścisia: dyspraporcyja rostu zakupačnych koštaŭ na materyjalna-techničnyja resursy i sielhaspradukcyju robić vytvorčaść apošniaj nierentabelnaj.
Havoračy pra padaražeńnie prajezdu ŭ hramadzkim haradzkim transparcie (z 30 žniŭnia na 20%), namieśnik ministra nahadaŭ, što apošniaje padaražeńnie hetych pasłuh pravodziłasia ŭ lipieni minułaha hodu.
«My nie planujem padvyšać košt prajezdu bolš, čym raz na hod» — padkreśliŭ jon. Było adznačana, što prajaznyja miesiačnyja i dekadnyja kvitki buduć daražeć adnosna talonaŭ udvaja mienš. Robicca heta z metaj papularyzacyi vykarystańnia prajaznych dakumentaŭ.
Kab kampensavać inflacyju, z 1 vieraśnia padrastuć pensii, a z 1 kastryčnika pavysicca taryfnaja staŭka 1-ha razradu, pamier jakoj na siońnia składaje 65 000 bieł. rub. Pamiery rostu pakul nie razhałošvajucca. Vidać, chočuć, kab heta stała pryjemnym siurpryzam kupcam małaka i benzynu.
Siamion Piečanko
* * *
Ad 30 žniŭnia ŭ Miensku padaražejuć kvitki
na ŭsie vidy hramadzkaha transpartu, pra heta «Našaj Nivie» paviedamili ŭ filijale «Ahienctva pa raspaŭsiudzie biletnaj pradukcyi» KUP «Minsktrans». Ciapier poŭny kvitok budzie kaštavać 600 rubloŭ, a lhotny 300, zamiest siońniašnich 500 i 250 rubloŭ. U «Minsktransie» skazali, što košty na kvitki nie pavialičvalisia bolš za hod i ciapier pryjšoŭ čas, kab heta zrabić.
Staryja kvitki buduć dziejničać ciaham dziesiaci dzion. Prajaznyja kvitki na nastupny miesiac i pieršuju dekadu vieraśnia pakul možna nabyć pa starych cenach. Jašče nie viadoma, kolki buduć kaštavać novyja prajaznyja na miesiac.
ZP