Taniec z prezydentam abo 18 miljonaŭ
Pravieranyja sposaby ŭniknuć raźmierkavańnia na viosku.
Da apošniaha času ličyłasia, što ŭ vypusknika VNU paśla jaje zakančeńnia jość dva šlachi: albo jechać na pryznačanaje raźmierkavańniem miesca pracy, albo viarnuć dziaržavie hrošy za svajo navučańnie. Jeŭraradyjo stali viadomyja jašče niekalki varyjantaŭ paśladypłomnaha ŭładkavańnia.
Vypusknicu Minskaha dziaržaŭnaha linhvistyčnaha univiersiteta Jaŭhieniju Šašniovu raźmierkavali ŭ 2006 hodzie ŭ Drahičynski adździeł adukacyi. Tam joj pavinnyja byli nazvać viaskovuju škołu, kudy jana pajedzie pracavać vykładčycaj anhlijskaj i francuzkaj movaŭ. Ale małady śpiecyjalist u adździeł adukacyi 15 žniŭnia nie źjaviłasia, i hałoŭny śpiecyjalist Alena Paŭlukovič «abjaviła jaje ŭ vyšuk».
Alena Paŭlukovič: «Ja adrazu paviedamiła pra heta va univiersitet, i tam pryniali rašeńnie, što jana pavinna kampiensavać za navučańnie. Ja pieradała ŭsie dakumienty ŭ prakuraturu, i hetaj spravaj ŭžo zajmalisia tam i vynosili svaje pastanovy».
Sakratarka Drahičynskaha suda pračytała Jeŭraradyjo, jak hučyć taja pastanova.
Sakratarka: «Spahnać z Šašniovaj Jaŭhienii 18 miljonaŭ 63 tysiačy 830 rubloŭ na karyść biudžetu Respubiki Biełaruś u košt kampiensacyi za navučańnie».
Pa słovach sakratarki suda, dziaŭčyna raskazała, što pajechała ŭ Maskvu, kab praciahvać navučańnie i adnačasova pracuje nastaŭnicaj francuzskaj movy, zarablajučy 300 dołaraŭ u miesiac. Tamu paprasiła raściahnuć vypłatu na hod. Ale sud vyrašyŭ nie davać dziaŭčynie adterminoŭki i pieradaŭ sudovamu vykanaŭcu rašeńnie suda dla spahnańnia hrošaj.
Śpiecyjalist Drahičynskaha adździeła adukacyi Alena Paŭlukovič raskazała Jeŭraradyjo, jakoje pracaŭładkavańnie čakała maładuju vypusknicu linhvistyčnaha univiersiteta.
Alena Paŭlukovič: «Maładych śpiecyjalistaŭ, kali jany vučacca pa metavym nakiravańni, to zhodna z Pałažeńniem «Ab metavaj padrychtoŭcy śpiecyjalistaŭ» — u sielskuju miascovaść».
Jaŭhienija Šašniova źbirałasia pastupać u MHIMO, pra što i paviedamiła ŭ adździele adukacyi, kali pryjazdžała ŭ Drahičyn zimoj 2006 hoda. Tam joj rastłumačyli, što paźbiehnuć abaviazkovaj 2‑hadovaj adpracoŭki pa raźmierkavańni možna, tolki kali damovicca va univiersitecie, kab raźmierkavali na dalejšuju vučobu.
Čamu ŭ dziaŭčyny nie atrymałasia damovicca, Jeŭraradyjo vyśvietlić nie ŭdałosia. Sama Jaŭhienija znachodzicca ŭ Maskvie, i jaje kaardynaty nichto nie viedaje. U jaje maci, u Drahičynie, telefona niama. A ŭ rektaracie linhvistyčnaha univiersiteta kateharyčna admovilisia razmaŭlać z žurnalistami na lubyja temy.
Zatoje paščaściła atrymać taki dazvoł u sioletniaj vypusknicy taho ž univiersiteta Maryny Fiedaruk. Usioj Biełarusi jana stała viadoma paśla taho, jak u Pałacy Respubliki tančyła vals na bali vypusknikoŭ z prezidentam. Maryna pavinna była pajechać pa raźmierkavańni ŭ Ivanava Bresckaj vobłaści ‑‑ pracavać nastaŭnicaj anhlijskaj, francuzskaj i italjanskaj movaŭ, jakija jana viedaje na «vydatna». Navat raskazała pra heta prezidentu. A voś śpiecyjalist Ivanaŭskaha adździeła adukacyi Taćciana Sachančuk raskazała Jeŭraradyjo, što da ich małady śpiecyjalist tak i nie dajechała.
Taćciana Sachančuk: «Nie dajechała jana da nas. Jana adprasiłasia, i my jaje adpuścili. Jana ŭ Minsku, u ekanamičnym univiersitecie».
Pa słovach supracoŭnicy adździeła adukacyi, byvaje, što maładych śpiecyjalistaŭ tak adpuskajuć, ale vielmi redka. Naprykład, kali jość takaja pavažnaja pryčyna, jak siamja. Jakaja pryčyna była ŭ Maryny Fiedaruk, abhruntavana patłumačyć u Ivanavie nie zmahli. A voś u tym, što joj znajšłosia b miesca pracy, upeŭnili.
Taćciana Sachančuk: «Kali stajała pytańnie ab jaje prybyćci, to my znajšli b joj miesca pracy. U jaje niekalki movaŭ, niekudy ŭładkavali b».
Naŭrad ci haścinna adčynić dźviery i jakaja‑niebudź ź viaskovych škoł Pinščyny pierad zorkaj biełaruskaj estrady Hannaj Šarkunovaj. Pa słovach dyrektara śpiavački Uładzimira Kubyškina, zaraz usio robicca dla taho, kab vypusknica piedahahičnaha univiersiteta imia Maksima Tanka zastałasia pracavać na scenie.
Uładzimir Kubyškin: «Zaraz ja nie chaču padrabiazna kazać pra heta, kab być karektnym u adnosinach da tych ludziej, jakija nam dapamahajuć vyrašyć heta pytańnie. Pakul jano nie vyrašana kančatkova».
U tym vypadku, kali śpiavačcy nie dapamohuć i joj treba budzie pajści ŭ padparadkavańnie Pinskamu adździełu adukacyi, dyrektar «zorki» płanuje adkupicca ad raźmierkavańnia.
Uładzimir Kubyškin: «Apłacim sumu navučańnia. Tam nievialikija hrošy, štości kala 7 miljonaŭ. Heta nie krytyčnaja suma».