Ekśpiert: Najchutčej «liškami» ŭzbrajeńnia stanuć samaloty Su-24 i Su-27

U aŭtorak u kiraŭnika dziaržavy prajšła narada, pryśviečanaja dalejšym nakirunkam budaŭnictva i raźvićcia biełaruskaha vojska.

Alaksandr Łukašenka zajaviŭ, što Biełaruś aptymizuje finansavańnie Uzbrojenych Siłaŭ, zatraty na avijacyju i Supraćpavietranuju abaronu pavialičać.

Ekśpiert pa ŭzbrajeńniach Alaksandr Alesin ličyć, što heta vymušany krok kiraŭnictva krainy, paviedamlaje «Jeŭraradyjo».

Alesin: «Heta vymušany krok, kali akazałasia, što raźvivać usie vidy i rody Uzbrojenych Siłaŭ niemahčyma z-za finansavaha deficytu… Nasamreč, toje, što hrošaj nie chapaje na vojska, vyśvietliłasia ŭžo daŭno. I asabliva na pieraŭzbrajeńnie. Tamu davodzicca vybirać najbolš važnyja ŭčastki. A kanflikty apošniaha času pakazali, što ŭdary z pavietra ciapier pieraŭtvarajucca ŭ rašajučy srodak źmieny situacyi na svaju karyść».

Alesin ličyć, što da «aptymizacyi» padšturchnuŭ i epizod sa šviedskim samalotam. Tamu treba terminova zakryvać dzirki ŭ Supraćpavietranaj abaronie na nizkich vyšyniach, jakaja stvarałasia jašče ŭ saviecki čas i jakoj patrebnaja «madernizacyja».

Taksama Alaksandr Łukašenka zajaviŭ pra nieabchodnaść dalejšaha skaračeńnia Uzbrojenych Siłaŭ i prodaž «liškaŭ» uzbrajeńnia.

Ekśpiert miarkuje, što «niepatrebnym uzbrajeńniem» mohuć akazacca bajavyja samaloty, jakija vyviedzienyja z ekspłuatacyi — Su-24 i Su-27.

Alesin: «Źjavilisia publikacyi, što Su-24 biełaruskija ŭžo ŭ Sudanie adznačanyja, 12 štuk… Dumaju, što heta ŭ rajony ŭzbrojenych kanfliktaŭ, u niezamožnyja krainy, režymy, jakija chočuć albo z susiedziami razabracca, albo kantrol u svaich krainach zachavać… Sudan dla biełaruskich starych uzbrajeńniaŭ idealny pakupnik».

Adnak vialikich hrošaj ad prodažu starych samalotaŭ nie budzie. Ale heta «choć niešta», bo ŭ ciapierašni čas ekanomika nie dazvalaje vydatkoŭvać vialikija hrošy na abaronu, kaža Alaksandr Alesin.

Kamientary da artykuła