Pampavać kłasiku prapanujuć u aŭtobusach
Siabry Maładoha Frontu źviarnulisia da kiraŭnictva Minsktransa i «Salihorskaha aŭtobusnaha parku №1» z prapanovaj raspačać kampaniju papularyzacyi biełaruskaj litaraturnaj kłasiki.
Aktyvisty moładzievaj arhanizacyi prapanujuć raźviesić u aŭtobusach płakaty z QR-kodami, pry dapamozie jakoha možna spampavać elektronnyja varyjanty knihaŭ.
Dyzajn i druk płakataŭ maładafrontaŭcy abiacajuć zrabić samastojna. Ad kiraŭnictva aŭtaparka prosiać tolki miesca dla rekłamy ŭ hramadskim transparcie.
Namieśnik staršyni MF Ivan Šyła adznačyŭ, što dla zapampoŭki mohuć być dastupnyja knihi, paśla śmierci aŭtara jakich minuła 75 hadoŭ. Mienavita ŭ hetym vypadku nie treba płacić za ich raspaŭsiud.
Takim čynam, možna budzie raspaŭsiudžvać tvory, naprykład, Maksima Bahdanoviča, Maksima Hareckaha, Ciški Hartnaha, Elizy Ažeški.
«Niama nijakaj kankretnaj pryčyny, čamu my chočam raspaŭsiudžvać knihi mienavita ŭ aŭtobusach. Vyklučna asabisty dośvied.
Sam, kali jezdžu ŭ aŭtobusach, čytaju elektronnyja knihi. A takuju ideju ja pabačyŭ u tramvai ŭ polskim Hdańsku. Padałosia, što heta cikava i karysna. My zaklikajem usich achvotnych dałučacca da inicyjatyvy i sprabavać realizavać takuju ž ideju ŭ svaich haradach — u transparcie, špitalach, škołach, usiudy, dzie byvaje šmat ludziej. My ŭ svaju čarhu dapamožam infarmacyjna i technična», — zajaviŭ Šyła.
U 2006 hodzie Salihorski aŭtapark pačaŭ ahučvać prypynki na biełaruskaj movie mienavita paśla taho, jak moładź sabrała kala dźviuch tysiač podpisaŭ.